Berlin, 4 shkurt 2025 (MIA) – Ish kancelari gjerman Gerhard Shreder është hospitalizuar për “lodhje kronike” (burnout), informon DPA.

Sipas letrës së mjekut të tij, Shreder vuan nga sindromi i lodhjes serioze me simptoma tipike të lodhjes së thellë dhe mungesë serioze të energjisë. 

Politikani 80- vjeçar ka probleme me përqendrimin dhe kujtesën, vuan nga dëmtime të gjumit dhe rezistencë të ulur emocionale, bëhet e ditur në raportin mjekësor. 

Me rekomandim të mjekut të tij, Shreder ka kërkuar hospitalizim, konfirmoi avokati i tij, Hans – Peter Huber për DPA. 

Organizata Botërore e Shëndetësisë (OBSH) e definon burnout si “fenomen profesional” i shkaktuar nga stresi kronik në vendin e punës i cili nuk është menaxhuar me sukses. 

Edhe pse Shreder është larguar nga funksioni i kancelarit para 20 vjetëve, ai zhvillonte karrierë aktive – por edhe kontroverse pas politikës. 

Ish lideri i Partisë Socialdemokrate ishte kritikuar ashpër për lidhjet e tij me Rusinë. 

Ai punonte për disa kompani shtetërore ruse dhe ruan marrëdhënie të afërta me presidentin rus Vladimir Putin. 

Në janar, Shreder e anuloi deklaratën e paralajmëruar para komisionit parlamentar në zonën veriore Meklenburg – Pomerania Perëndimore, e cila hetonte hollësi për ndërtimin e gazsjellësit “Rrjedha Veriore 2”, projekt të cilin ai e mbështeste derisa ishte kancelar. 

Mjeku i tij theksoi se Shreder për momentin, ndërsa sipas gjitha gjasave edhe në të ardhmen e afërt, nuk është i aftë të përballet me lodhjen fizike dhe psikologjike shumë gjatë – veçanërisht në publik – intervistim në komision hetues. fc/

Fotografia: Arkivi