Moskë, 6 shkurt 2025 (MIA) - Ministria e Jashtme ruse sot përshëndeti vendimin e administratës së re amerikane për mbylljen e Agjencisë për Zhvillim Ndërkombëtar (USAID), të cilën Moska e konsideron "makinë për ndërhyrje" në punët e vendeve të tjera.

"E vetmja gjë me të cilën jemi të kënaqur është se gjithçka që thamë u realizua”" tha zëdhënësja e Ministrisë Maria Zaharova, duke iu referuar kritikave të përsëritura ruse ndaj USAID-it.

Rusia e dëboi USAID-in nga territori i saj në vitin 2012, duke e akuzuar agjencinë për financimin e protestave të opozitës kundër Kremlinit dhe ndërhyrjen në zgjedhje.

Rusia ka akuzuar agjencinë amerikane për mbështetjen e lëvizjeve anti-qeveritare në vendet fqinje, veçanërisht në Ukrainë dhe Gjeorgji, me qëllim që të sjellë në pushtet njerëz që janë pro Uashingtonit dhe armiqësor ndaj Moskës.

"Është gjithçka tjetër veçse një agjenci për ndihmë, zhvillim dhe asistencë. Është një makinë për të ndërhyrë në punët e brendshme. Është një mekanizëm për ndryshimin e regjimit, rendit politik, strukturës së shtetit", tha Zaharova.

Agjencia amerikane tha dje se i gjithë stafi i saj në SHBA dhe në mbarë botën do të jetë në "mungesë administrative" duke filluar nga e premtja.

Agjencia tani është vendosur nën mbikëqyrjen e Sekretarit të Shtetit të SHBA-së, Marko Rubio.

USAID-i, i themeluar në vitin 1961 me një akt të Kongresit Amerikan, menaxhon një buxhet prej më shumë se 40 miliardë dollarë për ndihmë humanitare dhe zhvillimore në mbarë botën. Ajo punëson rreth 10,000 njerëz, dy të tretat e të cilëve janë dërguar jashtë vendit. sa/

Foto: Arkivi i MIA-s