Shkup, 3 shkurt 2025 (MIA) - Është e mundur që të arrihet pagë edhe më e lartë se 450 euro nëse Qeveria ndihmon përmes të ardhurave sociale, thonë punëdhënësit. Ata sot, para seancës së Këshillit ekonomiko-social (KES), deklaruan se çdo rritje që ndajnë në shumë prej 1.000 deri në 9.000 denarë duhet të përkrahet brenda një viti nga Qeveria përmes kontributeve sociale, ndërsa më tutje, me forcimin e ekonomisë, ka mundësi që të shlyhet plotësisht prej tyre.

Paga minimale nuk është pika nga rendi i ditës në seancën e KES-it, por, siç theksuan përfaqësuesit nga Lidhja e Sindikatës (LSM) dhe nga Konfederata e Sindikatave të Lira (KSL) do të kërkohet hapja edhe e kësaj çështje. 

Sipas LSM-së, nëse punëdhënësit duan të rrisin pagat e të gjithë punonjësve në sektorin privat, duhet të gjendet zgjidhje me të cilën Qeveria do të subvencionoj një pjesë të të ardhurave. KSL, nga ana tjetër, do të propozojë një formulë sipas së cilës Qeveria do të subvencionojë një pjesë të pagave të më të varfërve.

"Propozimi jonë është për rritje nga 1,000 deri 9,000 denarë në mënyrë që shteti të na ndihmojë me kontribute. Çdo rritje që punëdhënësit e ndajnë prej 1.000 deri në 9.000 denarë duhet të përkrahet brenda një viti nga Qeveria përmes kontributeve sociale dhe më tej, shpresojmë se me forcimin e ekonomisë, do të ketë mundësi që ato të paguhen në tërësi. Nga 24.800 denarë që janë tani, presim që në muajin mars të kemi subvencione në kontribute sociale deri në 34.000 denarë. Janë rreth 9,000 denarë. Propozimi i sindikatave është 27.000 apo 450 euro, por ne kemi shansin që nëse mbështetemi nga Qeveria me kontribute sociale, të rriten ato paga që të arrijmë një pagë minimale pak më të lartë në rajon. Kjo do të thotë se paga minimale do të negociohej më tej përmes marrëveshjeve kolektive në secilin sektor, por baza për rritjen çdo vit në muajin mars do të ishte në përputhje me metodologjinë e vendosur, ndërsa me marrëveshje të posaçme kolektive me sindikatat, duhet të ketë një rritje plus. Këto janë disa zgjidhje që ne propozojmë, sindikatat kanë diçka të ngjashme, por më e rëndësishmja është që numri i kompanive dhe i punonjësve të mbetet i njëjtë", sqaroi Mile Boshkov nga Konfederata e bizneseve të Maqedonisë. 

Ai gjithashtu vuri në dukje se rritja e shpejtë e pagës minimale është një barrë e madhe për kompanitë mikro, të vogla dhe të mesme, veçanërisht në sektorin e zejtarisë.

"Për fat të keq, në seancën e sotme të KES-it nuk ka pikë për rritjen e pagave, por ka pikë për pagën minimale të sindikatës. Me siguri do të na bindin se mirë jetohet në Maqedoni dhe se nuk ka nevojë të rriten pagat. Por, e gjithë kryesia jonë erdhi këtu për të kërkuar që pika e parë të ishte pikërisht nevoja për rritjen e pagave në sektorin privat dhe publik. Kemi propozimet tona që do t'ua paraqesim partnerëve social. LSM-ja tashmë ka mbajtur takime me përfaqësues të Organizatës së punëdhënësve, Konfederatës së biznesit dhe Odës Ekonomike të Maqedonisë Veriperëndimore se paga minimale duhet të rritet aq sa kërkojnë edhe vetë punëdhënësit. Duhet neve, sindikalistëve, të na vijë turp të themi se çfarë duan të na japin punëdhënësit. Duhet të gjejmë një mënyrë, nëse punëdhënësit duan të rrisin pagat e të gjithë të punësuarve në sektorin privat, të gjejmë një zgjidhje ku qeveria do të subvencionojë një pjesë të kontributeve si rritje të pagave të punonjësve ose ata do të lirohen për një periudhë kohore pas së cilës do të paguajnë kontributet. Kështu do të eliminojë ekonominë gri në fushën e 'rrogës në zarf' apo 'rrogës nën tavolinë', që i kushton arkës afër 250 milionë euro", tha kryetari i LSM-së, Sllobodan Trendafilov. 

Ai shtoi se këtë muaj KES-i duhet të takohet dy herë në javë përmes grupeve punuese për të diskutuar mbi rritjen e pagave.

"Nuk është mirë për askënd që pagat të ngecin dhe të mos rriten, siç ndodh në Bullgari, Serbi, Bosnje-Hercegovinë, Mal të Zi, Kroaci, Slloveni,... ku paga më e ulët është 457 euro e më shumë deri në 1,000 euro. Të gjitha palët duhet të kuptojnë më në fund nevojën e rritjes së pagave për të përmbushur nevojat e një familjeje me katër anëtarë. Qytetarët bojkotuan javën e kaluar sepse jeta u kushton shtrenjtë, sepse me paga të mjerueshme në ose afër pagës minimale nuk mund t'i sigurojnë vetes furnizimet bazë ushqimore, çdo ditë dy veta hanë, dy shikojnë", theksoi Trendafilov. qa/

foto/video: MIA