15:00/ 13 mars/ 2026

Shkup - Kryeministri Hristijan Mickoski thotë se vitin e kaluar Maqedonia shënoi rritje të produktit të brendshëm bruto, gjë që e vendos atë midis pesë vendeve të para në Evropë. Nëse vazhdojnë trendet nga fillimi i këtij viti, thotë ai, nuk do të befasohet të jetë midis tre vendeve të para në aspektin e rritjes së PBB-së në Evropë. Sipas tij, kjo do të thotë që qytetarët mund të fillojnë ta ndiejnë rritjen përmes rritjes së standardit të jetesës dhe fuqisë blerëse. "Vitin e kaluar, 2025, si ekonomi e RMV-së, shënuam rritje të PBB-së që na vendos në pesë vendet e para në Evropë. Dhe tani do të them edhe një herë se ndoshta do të tallen në rrjetet sociale nga opozita, por këto janë numra dhe fakte të publikuara nga Eurostat. Në vitin 2024, për shkak të gjysmës së dytë të mirë, ishim në dhjetë vendet e para, në vitin 2025 jemi në pesë vendet e para, dhe për këtë 2026, nëse gjërat shkojnë siç filloi viti, nuk do të befasohem nëse jemi në tre vendet e para. Dhe çfarë do të thotë kjo? Kjo do të thotë se më në fund ngadalë por me siguri do të fillojë të ndihet nga qytetarët, gjegjësisht, standardi dhe fuqia blerëse do të rriten, tha Mickoski në përgjigje të pyetjes së një gazetari gjatë vizitës në Koçan.

Shkup – Nuk ekziston problem i cili nuk mund të zgjidhet përmes dialogut, bisedimeve dhe marrëveshjeve të sinqerta, që është rasti edhe me sjelljen korrekte të tregtarëve në vend në periudhën e fundit, thotë kryeministri Hristijan Mickoski.  “Nuk do të shprehesha kaq ashpër me retorikën në pjesën e shfaqjes së muskujve ose shfaqjes së forcës nga shteti. Mendoj se përmes një dialogu konstruktiv nuk ka problem që nuk do të zgjidhet, si edhe të gjitha problemet deri më tani. Në këtë mënyrë, nga Maqedonia që disa vjet më parë ishte e gjunjëzuar dhe bënte shfaqje kur mori një donacion prej 5.000 vaksinash kundër Kovidit, tani jemi bërë vend që është një faktor stabiliteti në rajon, i cili i ndihmon fqinjët e saj”, tha Mickoski në përgjigje të pyetjes së gazetarëve nëse sjellja e drejtë e tregtarëve në periudhën e fundit është rezultat i "shfaqjes së muskujve" nga shteti ndaj tyre.  Përkujtoi se shteti lëviz përpara si rezultat i marrëveshjeve dhe bisedave të tilla dhe për këtë mund të jetë faktor stabiliteti në rajon madje edhe t’u ofrojë ndihmë fqinjëve.

Shkup - Në kushte kur çmimet e naftës po rriten në tregjet botërore dhe i gjithë rajoni dhe bota po përballen me presion çmimesh, furnizimi me karburant në Maqedoni është i qëndrueshëm, kompanitë kanë siguruar furnizime, përveç kësaj furnizimi është forcuar përmes tubacionit të produkteve të naftës "Vardaks", ndërsa Qeveria po e ndjek nga afër situatën. Nëse presionet globale të çmimeve vazhdojnë, jemi të gatshëm të përdorim të gjitha mekanizmat që kemi në dispozicion për të mbrojtur standardin e jetesës së qytetarëve, deklaroi sot Ministrja e Energjetikës, Minierave dhe Burimeve Minerale, Sanja Bozhinovska, në konferencën e përbashkët për shtyp me drejtorin ekzekutiv të SHA "Okta" - Shkup, Dimitris Pashos. Ajo kujtoi se sipas Rregullores për nivelin dhe mënyrën dhe llogaritjen e rezervave operative, tregtari duhet të ketë në çdo kohë rezerva operative të derivateve të naftës dhe karburanteve për transport për të mbuluar një vëllim mesatar tregtar pesëditor për secilin derivat të naftës individualisht, të arritur nga viti kalendarik i kaluar.

Shkup - Seanca parlamentare në të cilën Nenad Saveski duhet të emërohet si Prokuror i ri publik i shtetit, është caktuar për të mërkurën më 18 mars. Saveski, gjyqtari aktual i Gjykatës Penale, u propozua nga Qeveria më 10 mars, ndërsa që të votohet nga Kuvendi, ai duhet të marrë mbështetjen e 61 deputetëve. Nenad Saveski ka lindur në vitin 1976, jeton në Gostivar, i martuar, baba i 3 fëmijëve. Ai ka magjistër i shkencave juridike – e drejta penale, ka magjistruar në Fakultetin Juridik "Justiniani i Parë" në USHCM- Shkup, ku edhe ka përfunduar studimet. Ka dhënë provimin e jurisprudencës në vitin 2003. Shkollën e mesme e ka përfunduar në gjimnazin "Pance Poposki" në Gostivar.  Saveski nga viti 2016 është gjyqtar në Gjykatën Themelore Penale në Shkup. në departamentin për krim të organizuar dhe korrupsion.

Shkup - Eksporti i shërbimeve të informacionit, kompjuterave dhe telekomunikimeve në vitin 2025 arriti 676 milionë euro, që paraqet rritje prej 7 për qind në krahasim me vitin 2024. "Lajme të mira sot - industria IKT e Maqedonisë vazhdon të thyejë rekord në ekonomi. Sipas të dhënave të Bankës Popullore, eksporti i shërbimeve IKT në vitin 2025 arriti 676 milionë euro, që paraqet rritje prej 7 për qind në krahasim me vitin 2024. Veçanërisht e rëndësishme është që sektorit i IKT-së realizon rritje të vazhdueshme dhe një bilanc pozitiv tregtar", shënoi ministri i Transformimit Digjital Stefan Andonovski në Fejsbuk. Në vitin 2025, eksporti i shërbimeve IKT arrinte 197 milionë euro, që sipas tij, do të thotë se neto efekti për ekonominë është një suficit prej 438 milionë euro.

Shkup- Transportin publik, si një pjesë kyçe e transportit urban të qëndrueshëm në Bashkimin Evropian, çdo ditë e përdorin 10,7 për qind e popullsisë. Në Maqedoninë e Veriut rreth 7 për qind e njerëzve çdo ditë përdorin autobusin urban, 2,6 për qind autobusin ndërurban dhe 0,06 për qind trenin (në total 9,6 për qind). Të dhënat tregojnë diferenca të mëdha rajonale dhe tregojnë se në disa komuna të Shkupit rreth 19 për qind e qytetarëve përdorin më shpesh autobusin urban. Rreth 10,7 për qind e personave mbi 16 vjeç në Bashkimin Evropian përdorin çdo ditë një formë të transportit publik, ndërsa mbi gjysma e popullsisë – 51për qind nuk përdorin fare transport publik. Në Maqedoninë e Veriut mbi një e treta e qytetarëve përdorin më shpesh makinën, ndërsa rreth 10 për qind e personave mbi 15 vjeç përdorin kryesisht transport publik, ndërsa mbi 8 për qind përdorin transport të organizuar. Më shumë njerëz çdo ditë përdorin transport publik në Hungari (19,6 për qind), Zvicër (19,2 për qind) dhe Luksemburg (19 për qind). Më pak përdorin në Qipro (4,5 për qind), Itali (5,1 për qind) dhe Slloveni (6,2 për qind). Nga vendet e rajonit në Shqipëri 16,8 për qind e njerëzve çdo ditë përdorin transportin publik, Bullgaria 15,3 për qind, Serbia 14,8 për qind dhe Greqia 6,7 për qind. 

Shkup - Presidentja Gordana Siljanovska-Davkova sot priti pjesëmarrësit e Konferencës rajonale të ambasadorëve austriakë nga Evropa Juglindore, nikoçir i së cilës është Ambasada e Republikës së Austrisë në Maqedoninë e Veriut dhe ambasadori Martin Pammer, në të cilën, siç informojnë nga kabineti i saj, të gjithë ambasadorët e kanë mbështetur hapur rrugën e Maqedonisë drejt Bashkimit Evropian, duke theksuar se perspektiva evropiane e vendeve të Ballkanit Perëndimor dhe gjetja e zgjidhjeve për përshpejtimin e integrimeve janë në fokus të konferencës së tyre rajonale. Siljanovska-Davkova, gjithashtu, theksoi se delegacioni, i udhëhequr nga ambasadorja Elizabet Kornfajnd, drejtoreshë e përgjithshme për Çështjet Evropiane dhe Ekonomike në Ministrinë Federale për Çështjet Evropiane dhe Ndërkombëtare të Austrisë, është provë e diplomacisë së sinkronizuar dhe aktive, e cila është e rëndësishme për perspektivën evropiane të rajonit. 

Shkup - Buxheti është likuid, paratë janë siguruar në kohë dhe ka hapësirë për masa nëse është e nevojshme - theksoi mbrëmë ministrja e Financave, Gordana Dimitrieska-Koçoska, e ftuar në emisionin “Vetëm intervisë” në TV Kanal 5. “Kemi punuar me përkushtim në periudhën e kaluar dhe po japim rezultatet sipas planit. Qytetarët mund të jenë të sigurt. Kemi siguruar paratë në kohë. Kushtet sipas të cilave i siguruam mjetet ishin shumë të favorshme. Kemi emetuar eurobligacion me normë më të ulët të interesit”, theksoi ministrja e Financave. Dimitrieska - Koçoska shtoi se ekziston një sfidë e madhe, por është inkurajues fakti që ka rritje të prodhimit të brendshëm bruto.

Shkup - Po punojmë intensivisht në përmirësimin e çdo segmenti të arsimit, sepse prioritet i Qeverisë është të ndërtojmë sistem arsimor që do t’i aftësojë të rinjtë të përballen me sfida reale. Ministria e Arsimit dhe Shkencës dhe Byroja e Zhvillimit të Arsimit në kohë të shkurtër realizuan aktivitete dhe tani e kemi Analizën e edukimit financiar në arsimin fillor në Maqedoni. Ajo tregoi se nxënësit tanë kanë njohuri faktike për termat financiarë, por shpesh u mungon aftësia për t’i zbatuar ato në praktikë, theksoi ministrja e Arsimit dhe Shkencës, Prof.Dr.Vesna Janevska, në ngjarjen me rastin e 15 Marsit-Ditës Ndërkombëtare të të Drejtave të Konsumatorëve, organizuar nga Byroja e Zhvillimit të Arsimit. Janevska tha se edukimi financiar është i njohur ndërkombëtarisht si një nga aftësitë kyçe të jetës dhe është pjesë e standardeve globale të arsimit. Ajo u ndihmon të rinjve të mësojnë si të menaxhojnë paratë e tyre, të shpenzojnë me përgjegjësi, të kursejnë dhe të investojnë me mençuri. Në të njëjtën kohë, i mëson të njohin rreziqet, ofertat e dyshimta, kontratat e pafavorshme dhe mashtrimet online.

Shkup - Moti për fundjavën e ardhshme do të jetë mesatarisht i vranët me periudha me diell, ndërsa pasdite, kryesisht në pjesët perëndimore, me kushte për reshje të shkurtra shiu. Deri në fund të kësaj periudhe do të vazhdojë mot i ndryshueshëm me vranësira dhe reshje të herëpashershme lokale të shiut, kumtoi sot Drejtoria për Punë Hidrometeorologjike. Deri të martën priten erëra të lehta deri në mesatare, kryesisht nga jugu. Era do të ndryshojë drejtim në lindje të mërkurën, ndërsa në verilindje të enjten. Temperatura ditore nga e martja do të ketë tendencë të ulet.

Tetovë – SPB Tetovë informon se dje është privuar nga liria një 18-vjeçar nga rrethi i Tetovës, i cili kishte dërguar kërcënime se do të vendosë bomba dhe do të kryejë vrasje në shkollën e mesme të Tetovës “Nikolla Shtejn” në Tetovë.   “Nga prindërit e nxënësve kanë marrë informacion se M.R. u dërgonte nxënësve porosi, përkatësisht kërcënonte se do të vendoste bomba dhe do të kryente vrasje në shkollë. Menjëherë nga ana e nëpunësve të policisë nga SPB Tetovë janë ndërmarrë masa dhe aktivitete përkatëse dhe, pas marrjes së urdhrit të gjykatës, është kryer kontroll në fshatin Pallaticë, rajoni i Tetovës, në shtëpinë dhe ambientet ndihmëse të R. R. (49). Gjatë kontrollit janë gjetur disa sende që i përkisnin djalit të tij M. R. (18), të cilat dyshohet se kanë origjinë nga një vepër penale. Pas dokumentimit të plotë të rastit, do të ngrihet një kallëzim përkatës”, njoftoi SPB Tetovë.

Gostivar- Kryetari i Komunës së Gostivarit, Valbon Limani sot promovoi fillimin e punimeve për rikonstruktimin e dy rrugëve në lagjen "Lajthia" me gjatësi të përgjithshme prej 1.000 metrave. "Bëhet fjalë për dy rrugë në lagjen Lajthia në gjatësi 1.000 metre. Bëhet rikonstruimi i tërësishëm  këtyre dy rrugëve, kurse në plan është paraparë edhe dy rrugë të tjera që mbesin në këtë lagje dhe me këtë, komplet lagjen do të bëhet rikonstruimi i tërësishëm", u shpreh kryetari Valbon Limani.

Koçan – Zgjidhja për transportuesit do të jetë në drejtim të dhënies së vizave afatgjate të punës, të cilat duhet të nënkuptojnë qëndrim të rregulluar të të gjithë transportuesve tanë të cilët hyjnë në zonën Shengen pa dallim nëse bëhet fjalë për transport me kamionë ose transport me autobusë, deklaroi sot nga Koçani zëvendëskryeministri dhe ministër i Transportit, Aleksandar Nikolloski, duke u përgjigjur në pyetjet e gazetarëve.  “Zvicra tashmë lëshon viza të tilla për transportuesit nga Maqedonia, Kroacia njoftoi se aktualisht ekziston procedurë ligjore për miratimin e një ligji përkatës në Parlamentin kroat, dhe ne po punojmë në koordinim me Ministrinë e Punëve të Jashtme dhe Ministrinë e Punëve të Brendshme, dhe në koordinim me kryeministrin, që edhe disa vende të tjera të lëshojnë viza të tilla për transportuesit nga Maqedonia, që do të thotë zgjidhje e plotë e problemit”, tha Nikolloski. Ai theksoi se çdo të enjte po mbahen takime në nivel teknik për zgjidhjen e këtij problemi. 

Koçan- Për rreth 2,5 denarë për litër priten të ulen çmimet e derivateve të naftës në vend, pasi Qeveria dhe Ministria e Energjetikës, Minierave dhe Burimeve Minerale ranë dakord për një zbritje me furnizuesin më të madh, kompaninë OKTA, informoi sot kryeministri Hristijan Mickoski.  Duke iu përgjigjur pyetjes së gazetarëve pas vizitës në Koçan, ai theksoi se kishte folur edhe me një pjesë të madhe të pronarëve të pompave të benzinës, të cilët kanë thënë se zbritjen do ta përcjellin te përdoruesit përfundimtarë. "Lajm i mirë për qytetarët e Maqedonisë së Veriut është se OKTA nga sot do t’u japë kompani­ve të cilët bashkëpunojnë me të një zbritje prej rreth 45 deri në 50 dollarë për ton. Kjo do të thotë një ulje prej rreth 2,5 denarë për litër. Meqenëse çmimin maksimal e përcakton rregullatori, pres që pasi kjo të bëhet publike, gjatë ditës nafta dhe derivatet e naftës të ulen për rreth 2,5 denarë për litër", deklaroi Mickoski.

Tiranë - Sipas të dhënave të publikuara në bazën ndërkombëtare të të dhënave SIPRI Arms Transfers, Shqipëria ka marrë 50 dronë kamikazë YIHA-III, të prodhuar nga industria turke e mbrojtjes. "Në këtë bazë të dhënash, këto dronë klasifikohen si "loitering munition", një lloj municioni që mund të qëndrojë në ajër për një kohë të gjatë dhe më pas të godasë me saktësi objektivin. Sistemi është projektuar për sulme precize ndaj radarëve, sistemeve të mbrojtjes ajrore dhe objektivave strategjikë. Dronët kamikazë ndodhen në bazën ajrore Kuçovë, raportuan mediat shqiptare. Kryeministri i Shqipërisë, Edi Rama, deklaroi më parë se këto dronë janë dhuratë nga Turqia, si pjesë e bashkëpunimit strategjik midis dy vendeve.

Ankara - Një raketë balistike e lëshuar nga Irani, e cila hyri në hapësirën ajrore turke është neutralizuar nga elementët e mbrojtjes ajrore dhe raketore të NATO-s të vendosur në Mesdheun lindor, kumtoi Ministria Turke e Mbrojtjes Kombëtare.  Në kumtesë theksohet se Ankaraja po merr me vendosmëri të gjitha masat e nevojshme kundër çdo kërcënimi që synon territorin dhe hapësirën ajrore të saj, publikoi "Anadolu".  Ministria kompetente shtoi se po zhvillohen bisedime me vendin kompetent për të sqaruar rrethanat e incidentit. 

Budapest - Shefi i diplomacisë hungareze, Peter Sijarto, deklaroi se SHBA-ja ka pezulluar sanksionet ndaj transportit detar të naftës ruse, por se Bashkimi Evropian nuk e ka ndjekur shembullin e tyre, që, sipas tij, po nxit më tej rritjen e çmimeve të energjisë në Evropë, transmeton Anadollu.  Sijarto kritikoi Brukselin për atë që ai e quajti refuzim për të lehtësuar kufizimet që pengojnë naftën ruse të kthehet në tregun evropian.  Ai tha se Komisioni Evropian “vazhdon të kërcejë sipas melodisë së presidentit ukrainas Volodimir Zelenski”, duke aluduar se Bashkimi Evropian (BE) po mban sanksione pavarësisht presionit në rritje në tregun e energjisë.

Berlin - Kancelari gjerman Fridrih Merc deklaroi gjatë vizitës në Norvegji se vendi i tij nuk merr pjesë në luftën me Iranin, bënë të ditur mediat britanike. "Gjermania nuk është pjesë e kësaj lufte në Iran dhe ne nuk duam të marrim pjesë në të", tha Merci. I pyetur për Ngushticën e Hormuzit e cila është me rëndësi strategjike, kancelari tha se nuk ka arsye për t’u shqyrtuar ofrimi i mbrojtjes ushtarake për rrugët detare. Merci shtoi se Berlini mësoi për vendimin e SHBA-së për të hequr sanksionet e naftës kundër Rusisë, mëngjesin e sotëm pasi Uashingtoni lëshoi leje për të blerë naftën ruse të sanksionuar dhe produkte nafte të bllokuara në det.

Minsk - Presidenti bjellorus Aleksandar Lukashenko sot paralajmëroi Ukrainën dhe NATO-n që të mos e provokojnë Bjellorusinë, pasi Minsku mund të përdorë raketa Oreshnik.  "Nuk po them që nesër do të sulmojmë Vilniusin, Varshavën apo Kievin me Oreshnik. Ky nuk është qëllimi ynë. Ne duhet ta mbrojmë vendin tonë. Dhe për të mos e nisur Oreshnikun, mos na ngacmoni. As nga Ukraina, as nga Polonia, as nga Lituania, as nga Letonia. Le t'i zgjidhim problemet si njerëz", deklaroi Lukashenko. Ai shtoi se nuk po kërcënon asnjë vend apo organizatë.

Uashington - Presidenti amerikan Donald Tramp u tha liderëve të G7 në një takim virtual të mërkurën se Irani është "në prag të dorëzimit", raportoi sot Aksios, duke cituar tre zyrtarë të G7. Sipas raportit, Trampi u tha aleatëve se është "çliruar nga një kancer që kërcënonte të gjithë", ndërsa u mburr me rezultatet e operacionit "Zemërimi epik" në takimin e G7 të mërkurën në mëngjes. "Trampi tha se askush nuk e di kush është lideri, kështu që nuk ka askush për të deklaruar dorëzimin", raportoi Aksios.

Bejrut - Sulmet izraelite ndaj objektivave në Liban shkaktuan më shumë se 20 të vdekur gjatë natës, njoftuan zyrtarët libanezë këtë mëngjes, transmetoi DPA. Nëntë persona, me stë cilëlve edhe pesë fëmijë, u vranë vetëm në zonën përreth qytetit bregdetar të Sidonit., njoftoi Ministrisa libaneze të Shëndetësisë. Gjatë bombardimeve të mëtejshme në jug dhe lindje të vendit, humbën jetën edhe 14 persona, njoftoi po ashtu Ministria e Shëndetësisë. Në Beirut një person u vra gjatë një sulmi ndaj një automjeti. Ushtria izraelite refuzoi të komentojë konkretisht për këto sulme vdekjeprurëse, duke u referuar në vend të kësaj në një deklaratë zyrtare lidhur me operacionet e tij të fundit kundër milicisë pro-iraniane Hezbollah në Liban.