Teheran, 7 Mars 2026 (MIA) – Mediat shtetërore iraniane raportuan sot për dëme të konsiderueshme të shkaktuara në sulmet ajrore gjatë natës në mbarë vendin, përfshirë dy spitale në provincën jugperëndimore të Huzestanit.

Sipas televizionit shtetëror, Qendra mjekësore "Razi" në qytetin e Ahvazit dhe Spitali "Imam Ali" në Andimeshk u dëmtuan rëndë nga valët e goditjes nga shpërthimet pranë.

Transmetuesi shtetëror raportoi gjithashtu se sulmet kanë pasur në shënjestër edhe aeroportin "Mehrabad" në Teheranin perëndimor. Pamjet e publikuara tregonin zjarre në aeroport.

Këto informacione nuk mund të konfirmohen në mënyrë të pavarur për momentin, thekson DPA.

Ndërprerjet në funksionimin e aeroportit vendas të Teheranit, ishin ndër arsyet pse funerali i liderit suprem ajatollah Ali Hamnei i cili u vra një javë më parë u shty më herët këtë javë.

Hamnei do të varroset në faltoren "Imam Reza" në qytetin e tij të lindjes Mashhad. Faltorja në verilindje të Iranit është një nga vendet më të shenjta për myslimanët shiitë.

Udhëtimi nga Teherani në Mashhad, rreth 900 kilometra larg, zgjat rreth 10 orë me makinë. Rrugët janë mirë të njohura dhe automjetet mund të jenë potencialisht shënjestër për sulme izraelite ose amerikane.

Mediat iraniane raportojnë gjithashtu se gjatë natës u goditën instalimet ushtarake në Teheran, si dhe në pjesët qendrore, perëndimore dhe veriperëndimore të vendit.

Foto: DPA