Nuk, 8 janar 2026 (MIA) - Grenlanda duhet të zhvillojë bisedime të drejtpërdrejta me qeverinë amerikane pa ndërmjetësimin e Danimarkës, tha Pele Broberg, lider i partisë më të madhe opozitare të Grenlandës, Nalerak.

"I bëjmë thirrje qeverisë sonë të fillojë dialog me qeverinë amerikane pa Danimarkën", tha Broberg, lider i partisë opozitare Nalerak e cila angazhohet për pavarësinë e Grenlandës.

Ai tha se Danimarka me ndërmjetësimin e saj po i armiqëson si Grenlandën ashtu edhe SHBA-në. Nalerak dyfishoi numrin e vendeve në tetë në zgjedhjet e vitit të kaluar, duke fituar 25 për qind të votave në vend me vetëm 57,000 banorë.

Partia dëshiron një marrëveshje mbrojtjeje me Uashingtonin dhe po shqyrton mundësinë e një "aleance të lirshme" sipas së cilës Grenlanda do të merrte mbrojtje dhe mbështetje amerikane në këmbim të privilegjeve ushtarake, pa qasje të plotë në SHBA.

Të gjitha partitë në Grenlandë synojnë pavarësinë, por kanë mendime të ndryshme se si dhe kur ta arrijnë atë. Ministrja e Jashtme e Grenlandës, Vivian Motcfeld, deklaroi se Grenlanda nuk mund të zhvillojë bisedime të drejtpërdrejta me SHBA-në pa Danimarkën, sepse ligji nuk e lejon këtë.

“Duhet ta respektojmë ligjin dhe kemi rregulla se si t’i zgjidhim problemet brenda Mbretërisë”, deklaroi ajo për gazetën "Sermixhiak". Motcfeld shtoi se është e rëndësishme të vendoset një kurs i qëndrueshëm në marrëdhëniet me Uashingtonin.

"Shpresa ime më e madhe është se takimi do të çojë në normalizimin e marrëdhënieve tona", përfundoi ajo.

Foto: arkivi i MIA-s