Prishtinë, 29 dhjetor 2025 (MIA) – Partia e kryeministrit Albin Kurti fitoi në zgjedhjet e djeshme parlamentare në Kosovë, ndërsa rezultatet paraprake zyrtare sugjerojnë se ai ka fituar afër 50 për qind të votave, duke ndërpre kështu krizën politike që paralizoi vendin.

Komisioni Qendror i Zgjedhjeve (KQZ) bëri të ditur se "Vetëvendosje" ka fituar 49.79 për qind të votave pasi fletëvotimet u numëruan në rreth 95 për qind të qendrave të votimit. Partia Demokratike e Kosovës (PDK) dhe Lidhja Demokratike e Kosovës (LDK) u rreshtuan në vendin e dytë dhe të tretë me 21.18 për qind dhe 13.77 për qind", shtoi komisioni.

"Duhet të veprojmë sa më shpejt të jetë e mundur për të krijuar institucionet", theksoi Kurti pasi u shpallën rezultatet paraprake. Ai u bëri thirrje partive opozitare të bashkëpunojnë në parlament "në interes të qytetarëve dhe popullit" të Kosovës.

Në zgjedhjet e 9 shkurtit, partia e tij fitoi 42 për qind të votave, gjë që dështoi t’i jepte fund krizës politike pasi nuk u formua qeveri, duke i detyruar banorët e Kosovës të shkonin përsëri në zgjedhje. Rezultatet përfundimtare do të shpallen zyrtarisht pasi të numërohen votat e diasporës.

Për të formuar një qeveri funksionale, partia duhet të sigurojë 61 vende në Kuvend nga një total prej 120 vendesh. Rreth 45 për qind e votuesve të regjistruar dolën në zgjedhje, që është më shumë se në shkurt kur dalja ishte 40.6 për qind.

Një dështim tjetër për të formuar qeverinë dhe për të rimbledhur parlamentin do ta zgjaste krizën në një kohë vendimtare. Deputetet duhet të zgjedhin kryetar të ri dhe të ratifikojnë marrëveshjet e kredisë prej miliarda eurosh me Bashkimin Evropian dhe Bankën Botërore që skadojnë në muajt e ardhshëm.

Partitë opozitare kanë refuzuar të qeverisin me Kurtin, duke kritikuar lidhjet e tij me aleatët perëndimorë dhe qasjen e tij ndaj veriut të ndarë etnikisht ku jeton pakica serbe. Kurti fajëson opozitën për ngërçin politik.

Foto: EPA