Gazë, 4 shkurt 2025 (MIA) - Zëdhënësi i Hamasit, Abdul Latif al-Kanu deklaroi sot se kanë filluar negociatat për fazën e dytë të armëpushimit ndërmjet Izraelit dhe Hamasit në Gazë. Siç thuhet në një postim në rrjetin social Telegram, grupi palestinez mbetet i shqetësuar për një sërë çështjesh, siç janë strehimoret për banorët e Gazës, ndihma dhe rikonstruimi, transmeton Al Xhezira.

Al-Kanu akuzoi Izraelin për pengim të protokolleve humanitare, përfshirë marrëveshjen për armëpushim, si dhe shmangien dhe vonimin e zbatimit të tyre.

“Çështja e strehimit dhe e ndihmës për popullin tonë është një çështje urgjente humanitare që nuk mund të tolerojë shmangien dhe zvarritjen nga okupatorët”, ka thënë ai në postim.

Izraeli dhe Hamasi arritën armëpushim në mes të janarit pas më shumë se një viti konflikt.

Faza e parë e armëpushimit, nga tre të planifikuara, përfshin armëpushimin, lirimin e disa pengjeve, tërheqjen e forcave izraelite nga Gazë dhe kthimin e palestinezëve në pjesën veriore të Gazës, së bashku me fluksin e ndihmave humanitare.

Faza e dytë parashikon armëpushim për 42 ditë. Hamasi duhet të lirojë të gjithë pengjet e mbetura që ka mbajtur që nga sulmi ndaj Izraelit më 7 tetor 2023, ndërsa Izraeli duhet të lirojë gjithashtu një numër të të burgosurve palestinezë.

Në fazën e tretë, Hamasi do t'i kthejë trupat e pengjeve të vdekur nga Gaza në Izrael, Izraeli do të lirojë më shumë të burgosur dhe do të fillojë plani pesëvjeçar i rikonstruimit. Sipas planit, siç raportohet nga agjencitë botërore, Hamasi ra dakord të mos rinovojë arsenalin e tij ushtarak.

Foto: arkivi i MIA-s