Shkup, 17 tetor 2024 (MIA) - Kryetari i Lëvizjes ZNAM - Për Maqedoninë tonë, Maksim Dimitrievski thotë se personalisht është i zhgënjyer nga ndarja e Shqipërisë nga Maqedonia e Veriut në rrugën drejt BE-së dhe pret rritje të euroskepticizmit në vend, por beson se përpjekjet diplomatike duhet të vazhdojnë në drejtim të zhbllokimit të integrimit evropian duke mbrojtur me dinjitet interesat shtetërore.

"Unë personalisht jam i zhgënjyer. Fillimisht i uroj suksese Shqipërisë, është vendi ynë fqinj dhe i gjithë rajoni duhet të integrohet siç duhet. Unë kam një mendim se sinqerisht termi Ballkani Perëndimor më shqetëson sepse këtë ua them të gjithë diplomatëve të huaj nga vendet evropiane. Ne nuk jemi më pak evropianë se ata. Ashtu siç ata patën fatin të lindin në Evropën Perëndimore, ne lindëm në Evropën Juglindore dhe Lindore. Unë mendoj se nëse BE-ja nuk gjen instrumente, mjete, sepse ne tani po diskutojmë në nivel multilateral për një problem bilateral të vetëvendosur nga Bullgaria, në vend do të ngrihet euroskepticizmi. Dhe mendoj se fakti që ne në thelb po luftojmë për të mos lejuar ndikimin e huaj në rajon, ndërkohë që ndikimi kinez dhe rus, fatkeqësisht do të rritet dhe Evropa duhet të jetë e vetëdijshme për këtë. Prandaj besoj se përpjekjet tona diplomatike duhet të vazhdojnë, por me kurriz të drejtë e jo të përkulur, me dinjitet t'i mbrojmë interesat tona kombëtare shtetërore ashtu si populli maqedonas, shtet maqedonas dhe interesat e të gjithë qytetarëve të Maqedonisë", thotë Dimitrievski në "Vetëm intervistë" në televizionin Kanal 5.

Në koalicionin qeveritar, ai dhe kryeministri ndajnë qëndrim të ngjashëm për ndryshimet kushtetuese me efekt të vonuar, ndërsa për premtimet e VLEN-it se negociatat me BE-në mund të fillojnë pas gjashtë muajsh, kryetari i ZNAM-it thotë se këto janë premtime jo reale, duke theksuar se ndryshimet kushtetuese janë të mundshme vetëm me aplikim të vonuar dhe nëse sigurohen garanci nga Brukseli për identitetin dhe gjuhën.

"Unë nuk insistoj të them që është propozimi im, sepse është propozimi im, e kam thënë këtu, e kam fjalën për 6 korrikun me kolegun Taravari. Më vjen shumë mirë që sot është pjesë përbërëse e programit të qeverisë dhe shumica absolute në Kuvend e ka mbështetur me votën e kësaj Qeverie. Si një partner qeveritar më i vogël, jo më pak i vlefshëm,  jemi të kënaqur që pikëpamjet tona janë zbatuar në atë program qeveritar. Ajo që do të ndodhë me siguri dhe më se e qartë është se e gjithë kjo u refuzua nga ana bullgare në atë evropiane. Dhe është e qartë se në Bullgari nuk ka as një përqindje të vogël të interesit për tejkalimin e këtij problemi. Pikëpamjet e presidentit Radev janë të qarta, madje kanë tentuar disa herë të na poshtërojnë. Por kjo nuk tregon pasqyrën reale të shoqërisë bullgare dhe publikut bullgar. Kur flet me qytetarët bullgarë, ata janë të lehtësuar nga kjo çështje... Ndryshimet kushtetuese në këto kushte, siç diktohen, nuk mund të ndodhin. Ndryshimet kushtetuese mund të bëhen në bazë të vullnetit të mirë të shumicës në Kuvend, nëse paraprakisht ne si popull jemi dhe na garantohet vazhdimësia, rëndësia e vetvetes, gjuha, kultura, identiteti dhe historia. Duhet të garantohet nga BE-ja, pasi është negociatori në këtë proces për momentin. Herën e fundit që presidenti Radev tha se po negocioni me BE-në, nuk po negocioni më me ne, për ne është punë e përfunduar", thotë Dimitrievski.

Sipas tij, Qeveria e kaluar me nënshkrimin e protokollit të parë dhe të dytë dhe duke pranuar propozimin francez, na solli në gjendjen në të cilën jemi sot dhe thjesht duhet të luftojmë për pozitat tona.

Ai thekson se deri më tani nuk ka pasur asnjë shantazh as nga VLEN, as nga BDI, as nga ndonjë subjekt tjetër politik, ndërsa ZNAM është pjesë përbërëse e kësaj qeverie dhe ne, thotë ai, do të jemi pjesë përbërëse e kësaj qeverie deri në momentin kur konsiderojmë se kjo Qeveri punon me ndershmëri, përkushtim dhe në interes të qytetarëve dhe shtetit.

Në lidhje me propozimin e ish ministrit të Punëve të Jashtme Bujar Osmani, nëse BE-ja dhe Bullgaria nuk mund të na japin garanci se nuk do të ketë veto të re, duhet të parashikojmë me Ligjin Kushtetues që nëse ndodhin bllokime të reja, do të anulojmë amendamentet kushtetuese, kreu i ZNAM-it thotë se është një reagim i vonuar dhe është një propozim i parëndësishëm.

Ai nuk pret ndonjë ndryshim në qëndrimin zyrtar të Bullgarisë pas zgjedhjeve, sepse thotë se ky është qëndrimi i Kuvendit bullgar. Ai vlerëson se zgjidhja duhet kërkuar përmes lobimit në BE mes shteteve anëtare dhe përtej Atlantikut. sa/

Foto: Arkivi i MIA-s