Скопје, 15 јануари 2025 (МИА) - ЈП „Комунална хигиена“ - Скопје информира дека од јануари до декември 2024 година отстраниле вкупно 22 194 кубни метри отпад од голем број диви депонии лоцирани во сите скопски општини.

- Дивите депонии се создаваат како резултат на несовесното и непрописно одлагање отпад на јавни или сообраќајни површини со што директно се загадува животната околина и се загрозува јавното здравје. Најмногу диви депонии во текот на 2024 година се расчистени во општините
Чаир, Ѓорче Петров и Аеродром, каде е констатирана и најчеста појава на таканаречени „црни точки“ – локации каде во рамки на подолг временски период е забележано континуирано непрописно одлагање отпад, се вели во соопштението.

ЈП „Комунална хигиена“- Скопје потсетува дека продолжува на граѓаните да им ја нуди можноста својот стар мебел и неупотребливите електронски и електрични уреди  да ги одложат без плаќање надомест во Центарот за селекција на отпадот во Карпош, секој ден во неделата, од 9 до 19 часот.

На бесплатниот телефонски број 0800 222 33, жителите на Град Скопје може да ја нарачаат и услугата за преземање и транспорт на кабастиот отпад директно од нивните домови со специјалните возила на ова јавно претпријатие, што се наплаќа согласно однапред утврден Ценовник, објавен на веб-страницата на претпријатието. мд/аа/

Фото: ЈП „Комунална хигиена“ - Скопје