Аман, 24 декември 2023 (МИА) - Јеменската влада ги поздрави напорите на ОН за ставање крај на граѓанската војна во земјата, откако завојуваните страни ветија дека ќе се придржуваат до новиот прекин на огнот.

По серијата состаноци во Саудиска Арабија и Оман, бунтовниците Хути и владата се обврзаа на „збир на мерки насочени кон спроведување на национален прекин на огнот“. Тие, исто така, се согласија „да го продолжат сеопфатниот политички процес под покровителство на Обединетите нации“, соопшти вчера Светската организација.

Јеменската влада ја „поздравува“ изјавата на ОН за „напорите спонзорирани од ОН за ставање крај на војната“, се вели во соопштението. Владата, исто така, им се заблагодарува на Саудиска Арабија и Оман за нивните напори.

Јемен, најсиромашната земја на Арапскиот Полуостров, е зафатен од повеќегодишна војна меѓу Хутите и владините сили поддржани (од 2015 година) од коалицијата предводена од Саудиска Арабија. Интервенцијата на Саудиска Арабија не успеа да ги истисне Хутите од огромните територии што ги контролираа и сега Ријад бара излез од конфликтот.

Насилството во голема мера се намали по прекинот на огнот со посредство на ОН. Тој истече во октомври минатата година, но генерално се следи.

Во конфликтот загинаа стотици илјади луѓе, а милиони се раселени. ссм/

фото: архива