Скопје, 7 септември 2022 (МИА) - Општина Кисела започна со урбанизирање на централниот дел на општината. Градоначалникот Орце Ѓорѓиевски денеска изврши увид на улицата „Ѓорѓи Димитров”, веднаш спроти ДУРДМОВ „Димитар Влахов”, каде од утрово се работи на изградба на нов паркинг простор и уредување на патеката која ги поврзува „Ѓорѓи Димитров” и улицата „Локов”.

-Се работи за паркинг простор од околу 600 квадратни метри, каде ќе може да се паркираат 65 возила и патека од 300 квадрати која ќе ги поврзе овие две доста фреквентни улици. Во непосредна близина се наоѓаат и училиштето за деца со оштетен вид, како и градинка што укажува на потребата од дополнителни паркинг места, што пак ќе придонесе и за намалување на метежот и на изгубеното време во барање слободно место за паркирање. Освен на подобрување на функционалноста, која е приоритет за нас како локална самоуправа, градежните работи за поплочување и асфалтирање на патеките кои ги стартуваме во централното јадро на Кисела Вода, ќе овозможат уредување на просторот околу зградите и креирање на нов, урбан лик, изјави градоначалникот Ѓорѓиевски.

Во изминатиот деветмесечен период, општина Кисела Вода изгради повеќе паркиралишта, како паркингот на улицата „Бранко Заревски“. Покрај овој, во населбата Драчево, се гради и уште еден, на улицата „Коперникова“. Нов паркинг простор добија и жителите на „Бирарија“, до градинката, како и граѓаните кои живеат во близина на бензиската станица кај „Мечкаров“. Во фаза на изградба е пракиралиштето во Расадник, а веќе се нарачани сообраќајни проекти за улиците „Иван Козаров“ и „Христо Татарчев“ што ќе овозможат нови паркинг места и соодветно регулирање на сообраќајот во мирување. дма/са/