16 октомври 2025

Кандидатката за градоначалник на Град Скопје од СДСМ, Каја Шукова, вечерва одржа митинг во Бутел, каде пред жителите порача дека Скопје мора да се гради со дела, а не со празни зборови, се наведува во соопштението од СДСМ, кое МИА го пренесува интегрално.

-Вечерва не сум тука само како кандидатка за градоначалничка на Скопје. Тука сум, пред сè, како човек што верува во овој град и во луѓето што го прават Бутел дом, изјави Шукова.

Таа се осврна на реалните проблеми со кои се соочува општината запуштеното корито на Серава, недоволната инфраструктура, недостигот на јавен превоз и дотраената водоводна мрежа и истакна дека решенијата веќе се подготвени.

-Серава ќе стане место на кое ќе се гордееме уредено корито, пешачки и велосипедски патеки, зелена зона за сите. Новите паркови и 10.000 засадени дрвја ќе го вратат сјајот што Скопје го имаше пред децении, нагласи таа.

Посебен акцент стави и на водоснабдувањето и инфраструктурата:
-Денес, 60 проценти од питката вода се губи во системот. Време е за модернизација и стабилно снабдување со вода за секој дом. Новите мостови, клучки и булевари ќе го поврзат Бутел со целиот град и ќе овозможат безбедно и побрзо движење, рече Шукова.

Таа потсети дека во изминатите години градот беше заложник на неработење и популизам:
-Четири години ВМРО-ДПМНЕ ги запоставуваше општините. Време е за резултати, а не за слики и празни зборови. Половина од нашите проекти може веднаш да се реализираат, додаде таа.

Во својот говор, Шукова повика на единство и одговорност:
-Бутел не смее да биде изолиран. Бутел е почетна точка на модерното Скопје место каде што се инвестира, се гради и се слуша секој граѓанин.

Кандидатката за градоначалник на Град Скопје од СДСМ, Каја Шукова, вечерва се сретна со граѓаните на Шуто Оризари, каде што порача дека оваа општина е симбол на различност, но и на заедништво и солидарност.

 - Без разлика на вера, пол или националност сите сме еднакви и мора во овој град да има можности подеднакво за сите, порача Шукова 

Таа нагласи дека визијата „Скопје за сите“ значи град без поделби и нееднаквости:
-Сакаме Скопје во кое нема прва и втора класа на граѓани. Секој дел од градот, вклучувајќи ја и Шуто Оризари, заслужува иста грижа, исти услови и иста поддршка, рече таа.

Во своето обраќање, Шукова зборуваше за конкретните решенија што ги предвидува нејзината програма – уредени улици и пристапни патишта, улично осветлување во сите делови, редовно собирање смет, подобра поврзаност со јавниот превоз и поддршка за образованието и вработувањето на младите.

-Младите од Шуто Оризари треба да имаат иста шанса како секој млад човек во Скопје – да се образуваат, да работат, да се развиваат тука, во својот град, порача таа, додавајќи дека знаењето и шансата се најдобрите политики.

Шукова испрати порака на единство и заедништво:
-Не доаѓаме само да побараме поддршка, туку да изградиме партнерство. Вашиот глас не е бројка во изборен резултат, туку глас за правда, еднаквост и достоинство. Да изградиме град што не заборава никого, затоа што Скопје е наш дом, заврши Шукова пред жителите на Шуто Оризари.

СДСМ - Центар за комуникации со јавноста