Скопје, 22 февруари 2024 (МИА) - Во последното деноноќие имало 31 пожар на отворено во државава. Пожарникарите сите ги изгаснале, истовремено гаснејќи и други пожари во населените места, соопшти утрово Центарот за управување со кризи (ЦУК).

Согласно известувањата од регионалните центри за пријавени и изгаснати пожари на отворено, вчера биле регистрирани 12 пожари во Скопје, два во Тетово, по четири во Битола и во Штип, по еден во Струмица и во Велес и шест пожари во Куманово.

ЦУК апелира да не се пали вегетација на отворено, а појавата на пожар што побрзо да се пријавува на Единствениот повикувачки број за итни случаи 112 во ЦУК, како и другите итни случаи особено кога граѓаните имаат животозагрозувачки ситуации.

Центарот за управување со кризи информира дека во последното деноноќие имало вкупно 1 801 повици на Единствениот број за итни случаи 112, од коишто „реални“ повици биле 38,81 отсто, а 61,19 проценти биле за други потреби на граѓаните што не биле итни.

Кон полиција биле упатени 56,25 отсто, кон итната медицинска помош 34,03 отсто, а кон пожарникарите 7,64 отсто од реалните повици кон 112 во ЦУК. дма/са/

Фото: МИА архива