Париз, 5 декември 2023 (МИА) - Долниот дом на францускиот Парламент едногласно го усвои нацрт-законот за забрана на електронските цигари за еднократна употреба, во обид да ги заштити младите луѓе и да го ублажи негативното влијание на овие производи врз животната средина.

Пратениците на Националното собрание го усвоија овој закон доцна синоќа со 104 гласа „за“ и ниту еден против.

Предлог-законот, кој претходно го поддржа француската Влада, по усвојувањето на Долниот дом, ќе биде испратен до Сенатот, Горниот дом на Парламентот, каде што се очекува да биде усвоен. Законот би можел да стапи на сила до септември 2024 година.

Електронските цигари за еднократна употреба - кои чинат околу 10 евра - се мали уреди на батерии кои се особено популарни меѓу тинејџерите поради нивните различни вештачки вкусови.

Иако тие се главно без тутун, многу од нив содржат никотин, опасна и зависна хемикалија, а нивните мали литиумски батерии за еднократна употреба често завршуваат на депониите.

Предлог-законот е дел од поширокиот тренд бидејќи Велика Британија, Ирска и Германија разгледуваат слични мерки.

Нов Зеланд и Австралија веќе воведоа ограничувања, при што првите мерки наложуваат пониски концентрации на никотин и ограничувања кои се однесуваат на тоа дека електронските цигари за еднократна употреба не можат да се продаваат во близина на училиштата. паг/

Фото: МИА архива