Непјидо, 1 јули 2024 (МИА) - Четворица директори на синџир супермаркети во Мјанмар, вклучително и јапонски државјанин, се уапсени затоа што продавале ориз по исклучително високи цени, објавија државните медиуми во земјата, додека владејачката хунта во земјата разурната од војна се бори да ја стабилизира својата растроена економија.

Властите соопштија дека уапсиле 11 лица, вклучително и трговци со ориз и службеници од фабриките за ориз, обвинувајќи ги за „надуени“ цени од 31 до 70 отсто над пропишаното ниво.

Во Токио, главниот секретар на кабинетот Јошимаса Хајаши им изјави на новинарите дека јапонски државјанин бил испрашуван од полицијата во Јангон.

„Јапонската влада има намера да продолжи да презема соодветни чекори, вклучително и одржување контакт со компанијата за која работи јапонскиот државјанин и давајќи ја потребната поддршка, истовремено повикувајќи ги локалните власти за негово предвремено ослободување“, рече тој.

Мјанмарски медиуми јавија дека меѓу уапсените е и директорот на синџирот супермаркети Аеон Оранж, заедничко вложување меѓу јапонската компанија Аеон Ко и Креатион Мјанмар со седиште во Јангон.

Сиромашната југоисточна азиска земја е во превирања по државниот удар во февруари 2021 година, кога војската собори избрана цивилна влада, предизвикувајќи широки протести кои се претворија во вооружен отпор низ целата земја. Во услови на ескалација на насилството, сиромаштијата во Мјанмар е пораспространета отколку во кое било време во последните шест години, а недостигот на работна сила и намалувањето на вредноста на валутата го отежнуваат водењето бизнис, според Светската банка.

Минатиот месец, хунтата уапси најмалку 35 лица - трговци со злато и девизи и агенти за недвижности, како дел од напорите за стабилизирање на нејзината валута што брзо обезвреднува. рп/

Фото: МИА архива