Трудо: Победата на Трамп може да ја загрози борбата против климатските промени
- Победата на републиканецот Доналд Трамп на претседателските избори во САД во 2024 година може да ги загрози глобалните напори против климатските промени, изјави канадскиот премиер Џастин Трудо во интервју за Си-Би-Ес.
![Трудо: Победата на Трамп може да ја загрози борбата против климатските промени](https://mia.mk/images/20231223100745_big_730x400_44.webp )
Вашингтон, 23 декември 2023 (МИА) - Победата на републиканецот Доналд Трамп на претседателските избори во САД во 2024 година може да ги загрози глобалните напори против климатските промени, изјави канадскиот премиер Џастин Трудо во интервју за Си-Би-Ес.
Трамп, кој ја минимизира важноста на климатските промени, минатата недела рече дека кога ќе дојде на власт ќе се откаже од сегашното американско ветување, според кое земјите во развој треба да добијат три милијарди долари од САД за намалување на емисиите на јаглерод диоксид.
Поранешниот претседател ги критикуваше инвестициите на администрацијата на Џо Бајден во обновливи извори на енергија за време на кампањата.
„Да, постои загриженост особено за животната средина во време кога е толку важно да се оди напред за да се заштити и да се изгради економијата на иднината“, рече Трудо во интервјуто за CBS.
„Претседателството на Трамп што уназадува во однос на климатските промени ќе го забави глобалниот напредок на начини што ме загрижуваат“, додаде Трудо, опишувајќи го пристапот на администрацијата на Трамп кон климата како „закана, не само за Канада, туку и за светот“.
Законот, поддржан од Бајден, за борба против инфлацијата, кој доведе до огромни инвестиции во зелената транзиција, ја поттикна Отава да потроши милијарди за да привлече производители на автомобили да произведуваат електрични возила и компоненти за батерии во Канада.
Трамп еднаш го опиша Трудо како „нечесен и слаб“ лидер. ссм/
фото: архива