Вашингтон, 13 септември 2025 (МИА) – Американскиот претседател Доналд Трамп имаше вечера со катарскиот премиер во Њујорк, неколку дена откако американскиот сојузник Израел нападна лидери на Хамас во Доха.

Израел се обиде да ги убие политичките лидери на Хамас со напад во Катар во вторникот, што ризикуваше да ги наруши напорите поддржани од САД за постигнување примирје во Газа и ставање крај на речиси двегодишниот конфликт.

Нападот беше осуден на Блискиот Исток и пошироко, како чин што би можел да ги ескалира тензиите во регион кој веќе е на работ. Трамп во телефонски разговор со израелскиот премиер Бенјамин Нетанјаху изрази незадоволство од нападот и се обиде да ги увери Катарците дека такви напади нема да се повторат.

На Трамп и катарскиот премиер, шеикот Мохамед бин Абдулрахман ал-Тани, им се приклучи високиот советник на Трамп, американскиот специјален пратеник Стив Виткоф.

- Одлична вечера со претседателот на САД. Штотуку заврши, објави заменик-шефот на катарската мисија, Хама Ал-Муфтах на X.

Белата куќа потврди дека вечерата се одржала, но без да наведува детали.

Катарскиот премиер ал-Тани претходно во Белата куќа се сретна со потпретседателот Џеј Ди Венс и државниот секретар Марко Рубио. Извор запознаен со состанокот рече дека разговарале за иднината на Катар како посредник во регионот и за одбранбена соработка по израелските напади врз Хамас во Доха.

Трамп рече дека е незадоволен од израелскиот напад, кој го опиша како едностран потег што не ги унапредил интересите на САД или Израел.

Вашингтон го смета Катар за силен сојузник во Заливот. Катар беше главен посредник во долготрајните преговори за прекин на огнот меѓу Израел и палестинската милитантна група Хамас во Газа, за ослободување на израелските заложници во Газа и за постконфликтен план за територијата.

Ал-Тани во вторникот го обвини Израел за обид да ги саботира шансите за мир, но рече дека Катар нема да се повлече од својата улога на посредник. јт/

Фото: ЕПА