Токио, 16 јануари 2026 (МИА) - Премиерите на Јапонија и Италија, Санае Такаичи и Џорџа Мелони, се согласија денеска да соработуваат за зајакнување на економската безбедност како одговор на растечкото влијание на Кина.

Рим и Токио го подигнаа нивото на своите односи од „стратешко партнерство“ на „специјално стратешко партнерство“ за зајакнување на врските во „сите области“, од безбедноста до културата.

„Исклучително сум среќна што сум тука по нашата кратка средба во Јоханесбург и нашите телефонски разговори“, и рече Мелони на Такаичи на почетокот од нивната средба во резиденцијата Кантеи во Токио. „Ова е трет пат да дојдам во Јапонија во трите години откако сум на чело на владата и ова не е случајност, туку свесен избор“, додаде таа.

„Цврсто веруваме во овој сојуз, во оваа соработка и во ова пријателство“, нагласи Мелони.

„При мојата прва посета овде, ги подигнавме нашите односи на ниво на стратешко партнерство. При втората посета, за време на самитот на Г7 во Хирошима, ја искористивме можноста да разговараме за тригодишен Акциски план 2024-2027 со јасни цели и рокови, кои ги исполнивме“, продолжи италијанската лидерка. „Сега се враќам по трет пат - како прв европски лидер што ја посети Јапонија откако ја презеде функцијата - и ја користиме можноста повторно да ги подигнеме нашите билатерални односи на ниво на посебно стратешко партнерство“, додаде таа.

Третата посета на Мелони на Јапонија се совпаѓа и со 160-годишнината од воспоставувањето дипломатски односи меѓу Токио и Рим. Според Мелони, овој период докажа колку се длабоки, трајни и континуирани врските меѓу двете земји.

„Ова е исто така можност да се направи преглед на многуте глобални кризи и прашања на меѓународната агенда, да се потврди нашата заедничка посветеност за постигнување праведен и траен мир во Украина, за зајакнување на мировниот процес на Блискиот Исток и за обезбедување безбедност и стабилност во Индо-пацифичкиот регион“, рече Мелони.

Такаичи организираше државен ручек во чест на италијанската делегација во резиденцијата на Кантеи. Подоцна истиот ден, Мелони објави селфи во стилот на манга со својот јапонски колега на социјалните мрежи.

Во заедничката изјава на Такаичи и Мелони, објавена по состанокот, се вели дека двете земји „делат длабока загриженост за сите форми на економски притисок, спроведувањето на антипазарни политики и практики и наметнувањето ограничувања на извозот што ги нарушуваат глобалните синџири на снабдување за клучни компоненти“. 

Јапонија и Италија, исто така, ќе формираат советодавно тело за промовирање на соработката во области како што се вселенската технологија, вештачката интелигенција, роботиката и полупроводниците.

„Во време кога меѓународната заедница се соочува со сложена криза, а стратешката средина во Индо-пацифичкиот регион се влошува, тесната соработка меѓу истомислечките земји е поважна од кога било“, рече Такаичи на заедничката прес-конференција по разговорите со Мелони.

Јапонија и Италија, обете членки на Г7, ќе работат заедно за да обезбедат течен природен гас во случај на вонредни ситуации, како и за решавање на други проблеми со инфраструктурата и енергијата, додаде Такаичи.

Мелони, од своја страна, рече дека сојузот Јапонија-Италија има „голем потенцијал“. Таа додаде дека со Такаичи разговарала за прашањето за диверзификација на добавувачите на критични минерали и зајакнување на нивните синџири на снабдување. мс/ми/

фото: ЕПА