Скопје, 30 јули 2024 (МИА) - Зајакнување на капацитетите за царински контроли во насока на подобрување на безбедноста на границите и сузбивање на криминалот и корупцијата, биле дел од темите на денешната средба на директорот на Царинска управа Бобан Николовски и Фалк Шрајбер, царински офицер за врски на Република Германија, кој покрај за нашата држава, задолжен е и за Бугарија и Романија.

За време на состанокот, соопштија од Царинската управа, потенцирана била успешната соработка меѓу царините на двете земји, особено во делот на истрагите и царинските контроли, како и во делот на обуките и подобрување на стручноста на човечките капацитети во службата.

- Во периодот што следи максимално ќе се фокусираме на борбата против организираниот криминал, шверцот и подобрување на мерките во борбата против корупцијата, истакнал директорот Николовски и изразил подготвеност за продлабочување на соработката преку непосредна комуникација и размена на искуства. цр/бак/

Фото: Царинска управа