Богота, 16 септември 2025 (МИА) -  Специјален суд во Колумбија, основан врз основа на мировниот договор од 2016 година, денеска ја изрече првата индивидуална казна за седум поранешни лидери на Револуционерните вооружени сили на Колумбија (ФАРК), осудувајќи ги на максимална казна од осум години репарација за нивната улога во киднапирања и изнуда.

Пресудата ја изрече Специјалната единица за мир (JEP), која ги гони злосторствата против човештвото и воените злосторства извршени за време на конфликтот, и од бунтовници и од припадници на државните сили.

-Повеќе од пет децении, минатото владееше со нашата сегашност. Денеска го прекинуваме тој циклус, изјави претседателот на JEP, Алехандро Рамели, пред да ја објави пресудата, јавија британските медиуми.

Меѓу осудените се поранешниот лидер на ФАРК, Родриго Лондоно, познат како Тимоченко, и членовите на највисокото раководство Пабло Кататумбо, Пастор Алапе, Милтон де Хесус Тонсел, Хаим Алберто Пара, Хулијан Гвијо Кубиљос и Родриго Гранда.

Казната вклучува работа на проекти што вклучуваат учество на жртви и може да вклучуваат активности како што се изградба на патишта, пошумување, деминирање и потрага по исчезнати лица.

-Оваа пресуда не го брише страдањето, туку е чин на признавање, глас што признава дека она што се случило било неоправдано и нехумано, рече судијата Камило Суарез.

ФАРК, кои демобилизираа околу 13.000 членови по мировниот договор, со децении вршеа киднапирања за да собираат средства и вршат политички притисок, земајќи за цел цивили, војници, па дури и претседателски кандидати.

Политичката партија наследничка на ФАРК, Комуни, објави на платформата X дека „посветеноста кон мирот и достоинството на жртвите е потврдена“ и дека поранешното раководство „останува посветено на придонесот кон вистината и репарациите“.

Двајца од осудените, Кататумбо и Гајо, моментално се сенатори во мандатите доделени на Комуните според мировниот договор.

Комисијата за вистина, формирана како дел од мировниот процес, вели дека помеѓу 1990 и 2018 година се документирани 50.770 киднапирања, додека вистинскиот број се проценува дека е поблиску до 80.000.

Според наодите на комисијата, ФАРК е одговорна за околу 40 проценти од киднапирањата, додека останатите ги извршиле десничарските паравоени групи и бунтовничката организација ЕЛН.

Според условите на мировниот договор, повеќето членови на ФАРК добиле амнестија, додека лидерите се обврзани да учествуваат во истрагите на JEP.

Оние кои целосно ќе ја признаат вистината можат да добијат казни во форма на репаративна работа од пет до осум години, додека оние за кои ќе се утврди дека не соработувале целосно можат да бидат осудени на затворски казни до 20 години.

Вооружениот конфликт во Колумбија трае повеќе од половина век и одзел најмалку 450.000 животи.сд/

фото:ЕПА