Кавадарци, 10 ноември 2023 (МИА) – Синдикатот на „Еуроникел индустри“ денеска јавно бара поддршка од повеќе субјекти за спас на фабриката со околу 800 работници. Во присуство на целиот синдикален одбор, дадени се неколку предлози.

- Ние како синдикален одбор итно бараме прием и средба со премиерот Димитар Ковачевски, вицепремиерот Фатмир Битиќи и министерот за економија Крешник Бектеши, со цел да се побара поддршка за изнаоѓање на решение за нашата компанија во која сме вработени и нејзино понатамошно функционирање, информираше за МИА, Миле Ѓорѓиев, претседател на синдикалната организација.

Бараат средба и со директорот на една од банките или нејзини претставници како најголеми доверители и директно вклучени во моменталните процеси кои се случуваат со компанијата, за информација од нивна страна за нивните планови со компанијата, како и за евентуални нови инвеститори, кои би ја преземале компанијата и би го овозможиле нејзиното работење.

Се бара и итна средба со градоначалникот на општина Кавадарци Митко Јанчев и народните избраници од општината, за да добијат информации од нивна страна со кои тие располагаат и да се побара поддршка, за изнаоѓање на решение за компанијата, која е од огромно економско значење за самата општина, затоа што најголемиот дел од вработените се нејзини жители.

- Доколку не наидеме на разбирање и прием од наведените институции ние како СО на „Еуроникел индустри“ заедно со нашите вработени, ќе бидеме принудени да преземеме непопуларни мерки како протести и разни блокади на институции и патишта, а се со цел да се избориме за функционирање на компанијата и обезбедување на нашата егзистенција, додаде Ѓорѓиев. свд/ир

Фото: МИА архива и записникот на Синдикатот