Киев, 17 февруари 2025 (МИА) – Министерството за здравство на Украина денеска соопшти дека за приближно тригодишната војна при руските напади оштетени или целосно разурнати се 2.285 здравствени институции.

До средината на февруари 2025 година, непријателот оштети 1.964 здравствени установи и целосно уништи 301. Најзначајна штета беше причинета на болниците во Харков, Доњецк, Миколаев, Киев, Чернихив, Дњепропетровск, Херсон и Запорожје, се наведува во соопштението на Министерството за здравство.

Исто така се посочува дека руските сили оштетиле 240 специјализирани возила за итна медицинска помош, уништиле 273 и заплениле 80 амбулантни возила.

Украина со поддршка на меѓународните партнери продолжува да ја обновува здравствената инфраструктура. Досега целосно се реставрирани 594 здравствени установи, а делумно се реставрирани 370. ми/

фото: ЕПА