Скопје, 11 мај 2023 (МИА) - Денеска се одржа работилница фокусирана на приоретизација на стратешките области на Националната развојна стратегија. Цел на оваа работилница беше методолошки и според дефинирани чекори да се издвојат најбитните стратешки области на Националната развојна стратегија, соопштија од владината прес-служба.

Националната развојна стратегија,се појаснува, е комплексен процес за водење, на кој е потребна заедничка работа и синергија на сите постоечки сектори во државата. Овој процес е од големо значење за иднината односно развојот на нашата држава и затоа бара методичност и внимателен пристап при креирањето.

- Националната развојна стратегија, како 20 годишна стратегија за развој треба да ги мапира и да ги постави насоките на развојот и соодветно да ги искористи ресурсите со кои располагаме како држава. Креирањето на стратегијата не смее да зависи само од политичка волја, туку мора да биде заеднички процес, на сите чинители. Во таа насока освен денешниот настан, одржани се состаноци со академија, собрание, МАНУ, граѓански сектор, над 40 визионерски работилници во сите плански региони на кои учествуваа над 3.000 граѓани, а поставена е и платформа за јавни консултации - www.nrs.mk., стои во соопштението.

На настанот свое излагање имале Фатмир Битиќи, заменик-претседателот на Владата задолжен за економски прашања, координација на економските ресори и инвестиции, Фатмир Бесими, министер за финансии, Метју Лосон, амбасадор на Обединетото Кралство, Хенрик Маркуш, амбасадор на Република Словачка и Армен Григорјан, постојан претставник на УНДП.

За важноста на настанот, заменик-претседателот на Владата задолжен за економски прашања, Фатмир Битиќи истакнал дека Националната развојна стратегија ќе нѝ ја даде потребната јасност и визија за развојните цели и патека на нашето општество. За остварување на оваа стратегија, потенцирал, ќе биде потребно да вложиме напор и придонес сите ние, заедно, за нашата држава.

- Пред 30 години одлучивме дека ќе имаме суверена независна држава, сега 30 години подоцна имаме остварено една од главните стратешки приоритети а тоа е дел од НАТО алијансата. Веќе сме на патот за исполнување на втората главна стратешка определба која е заедничка, а тоа е полноправно членство во Европската Унија. Сега е време, имаме доволно искуство и колективна мудрост заедно да го видиме развојот кој ни е важен и каков сакаме да биде во следните 20 години, рекол Битиќи.

Министерот за финансии, Фатмир Бесими посочил дека Националната развојна стратегија ги инкорпорира стратешките определби кои веќе се поставени високо на листата на приоритети на земјата и за нивно спроведување се очекува широка поддршка и силна организациска структура.

- Таа е сублимат на сè она што и досега го правиме и ја изразува нашата силна волја во тоа да успееме, рекол Бесими.

Свое видување за Националната развојна стратегија дал и Метју Лосон, амбасадор на Обединетото Кралство, кој навел дека долгорочна Национална стратегија за развој бара поддршка од сите.

- Потребни се заложби од сите политички партии, отсликани во изборните програми на политичките партии. Граѓаните треба да ја видат политичката посветеност за постигнување заеднички договорени цели во сите политички визии. Многу труд се вложи за да дојдеме до оваа точка. Податоците собрани во претходните фази на Националната стратегија за развој сега треба да се стават под теми со фокус на потребите на граѓаните на оваа земја, истакнал амбасадорот Метју Лосон.

Забелешката по однос на настанот и важноста на Националната развојна стратегија даде и Хенрик Маркуш, амбасадор на Република Словачка, кој кажал дека фактот што постои голем интерес е доволен и сигурен показател дека е избран вистинскиот модел за изработка на документ за кој слободно можам да кажам дека е од клучно значење за економскиот и социјалниот напредок на земјата.

 - Според мене, нема поголема потврда дека сме на вистинскиот пат, од искажаната поддршка на сите оние кои не само што пројавија голем интерес, туку и споделија креативни идеи и иницијативи, изјавил Армен Григорјан, постојан Претставник на УНДП, стои во соопштението од владината прес-служба.  

На работилницата имало големо присуство на претставници од најразлични институции од Владата на Република Северна Македонија, претставници од граѓанскиот сектор, МАНУ, експерти од различни полиња на делување, меѓународни донатори и други релевантни институции кои дале свој придонес во дискусијата.

- Ова е редок пример каде преку инклузивен процес се вклучуваат сите вклучени страни, со цел заедничко, интердисциплинарно, наднационално и надполитичко креирање на Националната развојна стратегија, од која ќе зависат многу клучни процеси во следните 20 години, се вели во соопштението од Владата. цр/нд/

Фото:Влада на Република Северна Македонија