Скопје, 18 декември 2024 (МИА) - Уште едно детско игралиште денеска беше пуштено во употреба во Јака, во Општина Илинден, изградено со поддршка од „Пекабеско“, во насока на одбележување на јубилеј од 45 години постоење на оваа општествено одговорна компанија.

Детското игралиште е опремено со детски реквизити како лизгална, форми на коњчиња, клацкалки, лулашка, клупи, канти за отпадоци за почиста и поубава средина, како и партерно уреден простор со павер елементи.

Новото детско игралиште денеска го посетиле градоначалникот на Општина Илинден, Александар Георгиевски и директорот на „Пекабеско“, Слободан Кутревски.

Како што соопштија од општина Илинден, градоначалникот Георгиевски меѓу другото истакнал дека ова е второ детско игралиште во Јака, па така децата и од овој дел на населбата добија ново катче каде ќе можат да го поминуваат слободното време во игра и забава.

Директорот Слободан Кутревски изјавил дека ова е еден убав повод, каде во рамки на одбележувањето на јубилејот 45 години Пекабеско е изградено детското игралиште.

- Во соработка со Општината, Пекабеско донираше финансиски средства со кои се овозможи изградбата на ова детско игралиште кое ќе претставува катче за забава, игра и рекреација на најмладите жители од оваа општина. Децата и најмладите се нашиот најголем приоритет и заслужуваат најдобри услови за раст и развој, рекол тој.це/са/

Фото: Општина Илинден