Кито, 9 февруари 2025 (МИА) – Во Еквадор денеска се одржуваат претседателски избори, вторпат во изминатите 18 месеци во услови на безбедносна криза во земјата.

На изборите учествуваат 15 кандидати, од кои фаворит е актуелниот претседател Даниел Нобоа, кој првпат беше избран во 2023 година за да го доврши мандатот на неговиот претходник Гиљермо Ласо, кој поднесе оставка, го распушти Конгресот и предизвика нови избори за да избегне отповикување.

Доколку еден кандидат не освои повеќе од 50 проценти од гласовите или разликата меѓу двајцата најпопуларни кандидати не е поголема од 10 отсто, во април ќе се одржи втор круг од претседателските изборите.

Според анкетите, на второ место е левичарката Луиза Гонзалес, која исто така учествуваше на изборите во 2023 година. Таа е блиска соработничка на поранешниот еквадорски претседател Рафаел Кореа.

Граѓаните на Еквадор денеска ќе гласаат и за новиот состав на 151-члениот Парламент.

Членовите на Националното собрание се избираат со три методи – 15 се избираат со пропорционална застапеност со затворена листа во изборна единица на национално ниво, шест од прекуокеанските гласачи (по двајца од Канада/САД, Латинска Америка и Азија/Европа/Океанија). Останатите 116 членови се избираат од повеќечлените изборни единици со пропорционална застапеност од затворена листа, при што сите места се распределени со методот на Вебстер. Членовите на Националното собрание се ограничени на два мандати од четири години, без оглед дали се последователни или не. ми/

фото: МИА архива