Куманово, 11 март 2026 (МИА) - Општина Куманово започна со реконструкција на улица „425“, позната како стар Тромеѓански пат, во населбата Иго Тричковиќ. Проектот, како што информираше градоначалникот на Куманово, Максим Димитриевски опфаќа целосна реконструкција на трасата во должина од 1.540 метри, со што локалните власти очекуваат значително подобрување на сообраќајната инфраструктура и условите за движење на жителите од овој дел на градот. Според најавите од општината, во моментов се изведуваат градежни активности за машински ископ на постојниот слој на асфалт. По оваа фаза, предвидено е поставување дренажен канал, бетонски рабници, изградба на тротоари и асфалтирање на целата траса.

Градоначалникот на Куманово, Максим Димитриевски, информира дека реконструкцијата е дел од поширок пакет инфраструктурни проекти кои се реализираат со финансиска поддршка од Владата.

Проектот се реализира со средства обезбедени од Владата преку вториот јавен повик за поддршка на инфраструктурни проекти, што според локалните власти овозможува побрза реализација на зафатите во општинската патна мрежа.

-Работните активности се реализираат со финансиски средства обезбедени од Владата од вториот јавен повик за поддршка на инфраструктурни проекти- посочи Димитриевски, додавајќи дека ваквите инвестиции се важни за подобрување на локалната инфраструктура и квалитетот на живот на граѓаните.

Поради тековните градежни активности, од Општина Куманово информираат дека привремено ќе биде изменет режимот на општинскиот линиски превоз на патници на релацијата Бедиње – село Тромеѓа. Автобуската линија број 8 ќе сообраќа до и од автобуското стојалиште кај бензинската станица „Роси Петрол“, која се наоѓа на дел од регионалниот пат Р-1204, во близина на приклучокот со автопатот А2. Од општината појаснуваат дека ваквиот сообраќаен режим ќе важи сè додека не се создадат услови за нормално и безбедно одвивање на сообраќајот на улица „425“, односно на патот кон селото Тромеѓа. ам/дма/

Фото: Општина Куманово