Куманово, 27 февруари 2024 (МИА) - Почна целосна реконструкција на улицата на улицата „300“ во населабата Ајдучка чешма во Куманово со вкупна должина од 620 метри, соопштија денеска надлежните.

- Реконструкцијата вклучува машински и рачен ископ, целосно тампонирање, асфалтна подлога на целата улица, тротоари со бекатон плочки, вертикална и хоризонтална сигнализација, информираше денеска кумановскиот градоначалник, Максим Димитриевски.

Општина Куманово претходно аплицираше до Министерството за транспорт и врски за изградба на локалниот пат помеѓу селата Новосељане-Косматац-Мургаш, информираа во ноември, лани од општината. Покрај овој пат, општината подготви проект и за реконструкција на улицата „300“ во приградската населба „Ајдучка Чешма“.

-Проектот изградба на некатегоризиран локален пат село Новосељане-село Косматац-село Мургаш во Куманово, како и проектот за реконструкција на дел од улицата „. 300“ во „Ајдучка Чешма“ во Куманово, се аплицирани преку програмата за поврзување на локални патишта и улици, финансиски поддржани од страна на Меѓународна банка за обнова и развој-Светска Банка, преку потпишување на Договорот за заем за финансирање на Проектот за поврзување на локални патишта помеѓу Владата на Република Северна Македонија и Меѓународната банка за обнова и развој – Светска Банка, а во имплементација на проектна единица во Министерство за транспорт и врски на Република Северна Македонија, со што Општината Куманово во целиот овој процес е краен корисник, а целокупната постапка ја спроведува проектна единица, велат од општината.

Оттаму додаваат дека во проектната апликација избрани се патниот правец помеѓу трите села како и реконструкција на улицата, бидејќи ги исполнуваат критериумите, начелата за финансирање на ваков тип проекти од Светска Банка. И патниот правец помеѓу селата и улицата во приградската населба се во исклучително лоша состојба. Пред неколку години општина Куманово делумно го тампонираше патот помеѓу селата Косматац и Мургаш. ам/цр

Фото: Општина Куманово