Велес, 1 септември 2021 (МИА) - Во Општинскиот училишен дом „Лазар Лазаревски“ во Велес денеска започна вселувањето на станарите. Веќе се вселени 132 ученици но уште даоѓаат и нови, информира за МИА директорот Марјанчо Јорданов.

Вкупниот капацитет е 221 легло и се очекува целосно да биде исполнет, затоа што оваа учебна година за разлика од лани нема забрана на ограничување на легла.

Во Средношколскиот дом се вселуваат ученици од целиот Повардарски регион но и пошироко од источниот дел на земјава. Ги има од Кавадарци, Гевгелија, Свети Николе, но и од подалечните Пробиштип, Берово и Крива Паланка, а само мал дел од селата во велешко, како Горно и Долно Јаболчиште.

-Има голем интерес на учениците од другите населени места кои учат во Велес за вселување во домот, а каде континуирано секоја година се подобруваат условите за престој и домување, појасни Јорданов.

Инаку, престојот во домот за сите ученици - станари е бесплатно, а трошоците за сместување и храна со три топли оброка ги обезбедува МОН.ад/бт/