Џакарта, 12 април 2022 (МИА) - Индонезискиот парламент денеска го усвои долгоочекуваниот закон за сексуално насилство, чија цел е да го олесни покренувањето случаи и да им помогне на жртвите да бараат правда во земја каде што сексуалното насилство често се смета за приватен проблем.

Повеќето пратеници го поддржаа законот на пленарната седница на Парламентот, надгласувајќи го противењето на некои конзервативни групи во најголемата муслиманска земја во светот по шестгодишно размислување.

„Се надеваме дека со воведувањето на овој закон ќе се решат случаите на сексуално насилство“, рече пратеникот Пуан Махарани.

Активистите во голема мера го поздравија законот, иако некои се спротивставија на неговиот ограничен опсег, бидејќи се однесува само на неколку сексуални злосторства, а силувањето е изоставено. Владата појасни дека силувањето е покриено со ревизија на кривичниот закон на кој во моментов се работи. „Ова е секако чекор напред“, рече Асфинавати, правен експерт од колеџот Џентер кој им помагаше на жртвите на сексуално насилство, додавајќи дека силувањето требало да биде наведено во законот. Во Индонезија има зголемување на жалбите за сексуално насилство, додека гонењето на сексуалните злосторства стана комплицирано без конкретен закон. Активистите велат дека загриженоста на жртвите дека ќе бидат засрамени за време на испрашувањето, одвратила многумина да проговорат. Граѓанските организации велат дека е важно да се види како властите го спроведуваат законот. паг/