Бања Лука, 24 април 2025 (МИА) - Со одлука на високиот претставник во БиХ, Кристијан Шмит, да го суспендира финансирањето на Алијансата на независни социјалдемократи (СНСД) и Обединета Српска од буџетски фондови, банките во БиХ, кај кои овие две партии имаат отворени сметки, наредено е средствата што им се исплатени од буџетот од кое било ниво на власт да се префрлат во Централната банка на БиХ.

-Сите банки и сите нивни филијали под јурисдикција на Агенцијата за банкарство на Република Српска (РС) или Агенцијата за банкарство на Федерацијата БиХ, на кои се отвораат сметки на име на СНСД и Обединета Српска, вклучително и регионалните, локалните и општинските организации на овие две партии, се обврзани да ги префрлат на Централната банка на БиХ сите износи платени од буџетот на кое било ниво на власт веднаш по исплата, се вели во денешната одлука на Шмит.

Одлуката е објавена на официјалната веб-страница на Канцеларијата на високиот претставник (ОХР).

Се додава дека банките се обврзани да го пријават трансферот на овие средства до Централната банка до ОХР, како и до супервизорот за округот Брчко во БиХ.

„Банките ќе ја сметаат оваа одлука како мерка насочена кон спротивставување на опструкциите во спроведувањето на Општиот рамковен договор за мир во БиХ и секое непочитување на оваа одлука од страна на директор на банка или кој било поединец што дејствува во име на таа банка или кој било вработен во банката може да резултира со санкции, и против банката и против поединецот кој се смета за одговорен за таков неуспех во одредена банка“, се вели во одлуката.

Во одлуката на Шмит беше наведено дека таа е донесена во согласност со неговиот меѓународен мандат и затоа не може да биде предмет на ревизија од судовите на БиХ, судовите на ентитетите на БиХ или кое било друго тело.

Овие средства, како што е наведено во одлуката, ќе бидат префрлени на посебна сметка во Централната банка на Босна и Херцеговина, а износите на суспендираните средства за СНСД и Обединета Српска обезбедени на сите нивоа на власт „нема да се сметаат за неподмирена финансиска обврска“ кон овие партии.

Според одлуката, лицата одговорни за извршување на буџетот на сите нивоа на власта се должни веднаш да престанат да префрлаат средства на сметките на СНСД и Обединета Српска и да поднесуваат извештаи до ОХР на месечна основа, најдоцна до 15-ти секој месец, за спроведувањето на одлуката на Шмит.

Во одлуката се наведува и дека суспензијата на финансирањето на СНСД и Обединета Српска може да биде укината кога високиот претставник ќе оцени дека овие две партии го почитуваат Дејтонскиот договор. мс/

фото: МИА архива