Мадрид, 10 јуни 2025 (МИА) - Дин Хаузен изјави дека Реал Мадрид е „клубот на мојот живот“ откако беше официјално претставен по неговиот трансфер од 50 милиони фунти од Борнмут.

Трансферот дојде по извонредна сезона во која му помогна на тимот на Андони Ираола да заврши на деветтото место во Премиер лигата.

-Сакам да му се заблагодарам на претседателот Перез. Сакав да бидам тука од првиот ден. Не размислував за друг тим откако Мадрид ми се јави, рече Хаузен, кој е роден во Холандија, но се пресели во Шпанија на петгодишна возраст, од каде што доби пасош.

Дефанзивецот има 36 настапи за англискиот тим Борнмут, етаблирајќи се во Премиер лигата откако се приклучи од Јувентус минатото лето.

Неговите настапи му го донесоа првиот повик во шпанската репрезентација, дебитирајќи во четвртфиналето на Лигата на нации против Холандија во март.

Неговиот трансфер во шпанската престолнина доаѓа откако Реал Мадрид ја активираше клаузулата за ослободување во неговиот договор со Борнмут.

-Сакам да му се заблагодарам на моето семејство, затоа што ме носеше на тренинг секој ден, затоа што патуваше насекаде со мене. И им благодарам на моите браќа. Доаѓам во најдобриот клуб во светот и сум тука да дадам сè од себе. Се надевам дека заедно ќе освоиме многу трофеи. Реал Мадрид е клубот на мојот живот. Ви благодарам многу!, додаде фудбалерот. дс

Фото: Принтскрин