Дебар, 13 јануари 2026 (МИА) – Здружението „Бадникови поворки“ ја претставува новата Новогодишно-василичарска каланда во изведба на хорот „Митрополит Козма Пречистански“ – Кичево.

Оваа каланда ја носи пораката за здравје, бериќет и духовна обнова, како што со генерации се пеела при новогодишните благослови од дом на дом. Текстот на новогодишната каланда обединува делови од старата Дебарско-реканска песна и новиот современ и многу поучен текст.

Новогодишната каланда изразува еден достоинствен хорски аранжман, создавајќи топла празнична и духовна атмосфера за сите оние кои ја негуваат православната традиција.

Снимена е во студиото на Димитар Андоновски, аранжманот и оркестрацијата е на Владимир Димовски, видео записот, камера, монтажа и режија на Стојан Стојановски.

ТЕКСТ НА КАЛАНДАТА

„Чук, чук, кој иде?“ - Свети Василиј

Чук, чук, кој иде?- Свети Василиј.

Од кај иде? -Од Кесарија.

Што носи? - Здравје и бериќет од Господа.

Сурова година, весела година,

голем клас на нива, голем грозд на лоза,

црвено јаболко в градина,

живо и здраво до година.

До година - до амина.

Среќна и бериќетна Нова година.

Почнува Нова година

на Божјата милостина,

и со споменот на свети

и блажен Василиј Велики.

Со арно нека почнеме

во Христа живот обновен,

далеку од зло и прелест,

и украсени со доблест.

И во просвештението

според Евангелието,

и со љубов и во светост

да сведочиме пред светот.

Среќна ви Нова година

со чиста душа, спокојна,

и со радост и со славје,

и догодина со здравје.

Среќна и бериќетна Нова година - со здравје и радост во секој дом!

Изведбата е на хорот „Митрополит Козма Пречистански“ и голем број статисти кои со своето присуство создадоа вистинска новогодишна атмосфера. вт/мд/

Фото: Принтскрин од видео