Кочани, 5 ноември 2021 (МИА) - Досегашниот градоначалник на Кочани, Николчо Илијев на својот наследник Љупчо Папазов му остава позитивно салдо во Локалната самоуправа со вкупен износ од шест милиони евра. Од нив, еден милион евра се финансиски средства на сите сметки на Општината, а останатите се во проекти чија реализација е во тек. По соопштувањето на официјалните резултати од страна на Државната изборна комисија за вториот круг од локалните избори, Илијев потврди дека го завршува мандатот како градоначалник. - На оваа функција пристигнав тивко, се посветив максимално и вградив четири години од животот во дела кои ќе сведочат за една современа визија и отворен пристап во решавање на проблемите. Токму затоа не се чувствувам поразен! Заминувам уште потивко, со огромно задоволство, од таму од каде што дојдов, таму каде што припаѓам. На сите ви благодарам за поддршката и довербата. До новиот градоначалник упатувам искрени честитки и најубави желби за големи успеси, истакнува Илијев во писмен допис до јавноста. Вкупното салдо на сите сметки на Општина Кочани е над 63 милиони денари, додека реализацијата на Буџетот, заклучно со денеска е близу 224 милиони денари, се додава во дописот. Новото раководство на Општина Кочани добива дваесетина почнати проекти со избран изведувач, тековни работи или со обезбедени средства за реализација, а подготвена е и проектна документација за уште десетина други проекти. та/вг/