Крива Паланка, 15 декември 2025 (МИА) - Незаборавни концерти, програма за радосни детски авантури, спектакуларни настапи на бројни изведувачи од земјата и регионот во празнична атмосфера за сите генерации најави Општина Крива Паланка во рамки на програмата на годинашното издание на „Новогодишен базар“.

Отворањето е на 27 декември, со концерт на Мирза Селимовиќ, а до крајот на програмата и годината, следува богата и разновидна дневна и вечерна културно-забавна програма за сите генерации.

-„Новогодишниот базар 2025“ ќе биде епицентар на празничните случувања од 27 до 31 декември, на градскиот плоштад во Крива Паланка. Во топлиот претпразничен амбиент под илјадници светилки Крива Паланка и оваа година ве поканува да бидете дел од најмагичната новогодишна приказна со незаборавни концерти, детски авантури, спектакуларни настапи и празнична атмосфера за сите генерации, велат од службата за комуникација со јавноста на Општина Крива Паланка.

На 28 настапуваат Љубојна и Тајзи, а 29 декември е резервиран за настапите на Пајак со Лара и Бени Шаќири со „Нон Стоп“, а до крајот на програмата ќе се организираат: дневна програма и базар со основните и средното општинско училиште, настап на ДЈ Барни, Грин - Џ, за најмладите следува новогодишната претстава „Мечето Панда и Дедо Мраз“ и „Ѓурчиновски шоу“, детска претстава „Дедо Мраз и изгубениот костум“, Елфовска авантура и последниот ден од декември: настап на „Распеанo Симитче“, ДЏ Бобо, новогодишно дефиле со маски и спектакуларно пристигнување на Дедо Мраз.

-Нудиме незаборавни мигови, богата програма и празнична магија за сите генерации во најмагичниот период во годината, кога сите патишта водат кон Крива Паланка, велат од општината, поканувајќи ги сите граѓани на Крива Паланка, но и на соседните градови и регионот, да бидат гости на градот и да создадат заедно мигови што се паметат.ид/вј/

Фото: Општина Крива Паланка