Скопје, 26 мај 2022 (МИА) - Министерството за економија денеска по 13-ти пат ги додели Наградите за најдобрите општествено одговорни практики на македонските претпријатија во 2021 година. - Наградата во 2021 година се доделува за проектите и практиките кои се реализирани во период од две години, од 1 јуни 2019 до 1 јуни 2021 година, од причина што во 2020 година наградата не беше организирана. Во 2021 година на конкурсот за наградата се пријавија вкупно 19 проекти од 12 македонски претпријатија, соопшти Министерството за економија. Заменик-министерот за економија Зоран Маневски на доделувањето на наградите истакна дека компаниите се соочуваа и се уште се соочуваат со предизвикот за одржување на своите економски операции во таканаречената „нова реалност“. Некои од нив, како што рече, се обидуваат да ја задржат стекнатата пазарна позиција, други едвај ја одржуваат својата ликвидност, трети се борат да изнајдат модалитети за освојување нови конкурентски предности. Ова, додава, е период на адаптации, менување на стратегии за работа и воведување нови бизнис тактики. - Пандемискиот амбиент може да се смета и за еден вид поттик, во такви сложени околности на голема неизвесност и ранливост, компаниите да демонстрираат посветеност на иницијативи за помош на заедницата. Во сферата на општествената одговорност, компаниите може да се ориентираат кон бројни активности што би имале за цел да го олеснат животот и да го помогнат функционирањето не само на сопствените вработени, соработници и клиенти, туку и на пошироката заедница. Ова особено се очекува од поголемите и финансиски помоќни компании. Во услови на оваа пандемија, компаниите можат да ја одиграат централната улога во ублажувањето на тешките последици од кризата, кажа замениик-министерот Маневски. Маријана Лончар Велкова, претставник на Координативното тело за општествена одговорност на претпријатијата истакна дека националната награда за најдобри ОО практики на македонските претпријатија е начин да докажеме и да ги наградиме успешните примери во примената на концептот на ОО на претпријатијата. - Компаниите во нивните деловни активности и во нивната интеракција со заинтересираните страни, на доброволна основа, ги интегрираат социјалните грижи и грижата за заштитата на околината, кажа Лончар Велкова. Националната награда за првпат беше доделена во 2008 година. - Во 2021 година, на конкурсот за оваа Награда беа пријавени 19 проекти, од 12 претпријатија, од кои 10 се големи претпријатија (82 посто од вкупниот број субјекти), а две се мали и средни (18 проценти), поточно две средни. Од вкупно 19 проекти, 17 се на големи претпријатија (89 отсто), а две на мали и средни (11 проценти). Оваа година, за првпат аплицирало едно претпријатие, заедно со другите искусни општествено-одговорни претпријатија, што покажува дека интересот за Националната награда континуирано расте. Најголем број од пријавените компании се од финансискиот сектор (33 посто), од услужниот сектор (17 проценти) и прехранбената индустрија (17 отсто), стои во соопштението. Четири големи претпријатија аплицирале со вкупно 11 проекти во различни категории. Во четири категории конкурирале Алкалоид, во три категории А1 Македонија и во две категории Комерцијална Банка и Макпрогрес - Виница. Добитници на Националната награда за најдобри општествено одговорни практики на македонските претпријатијата 2021, во вид на статуетки во петте различни категории на наградата, се следните општествено одговорните проекти на Алкалоид АД Скопје ( „Луѓето пред сè“); А1 Македонија ДООЕЛ Скопје („The New Normal“);Халк Банка АД Скопје („HalkEco“);Алкалоид АД Скопје („Фотоволтаична електрана“) и НЛБ Банка АД Скопје („НЛБ Рамка за помош“). Проектите кои влегоа во потесен избор за доделување на статуетка, се наградуваат со Плакети, со кои беа наградени проектите на Алкалоид АД Скопје („Заштита на вработените во време на Ковид-19“); А1 Македонија ДООЕЛ Скопје ( „A1 Future Hub); Цементарница УСЈЕ АД Скопје („Грижа за благосостојбата на нашите луѓе“); Комерцијална Банка АД Скопје („е-Продавница за новата ера – Искуства и совети за поголема online продажба”); Комерцијална Банка АД Скопје („Борбата со Ковид-19 е заедничка обврска – Комерцијална го помага јавното здравство“); А1 Македонија ДООЕЛ Скопје („Интернетот не е само игра...Кликај безбедно!“); Фармахем ДООЕЛ Скопје („Со мали чекори до подобро утре!“). Во конкуренција од 19 проекти од сите категории, Признанието за најинвентивна практика го доби проектот „НЛБ Рамка за помош“ на НЛБ Банка АД Скопје. Признание за најуспешна практика во справување со последиците од кризата предизвикана од Ковид-19, во конкуренција на сите проекти од петте категории на Наградата за најдобри општествено одговорни практики во 2021 година доби проектот „The New Normal“ на А1 Македонија ДООЕЛ Скопје. - На сите останати проекти, организаторите им доделија Благодарници за учество во Наградата, како признание за вложениот труд, време и средства, наведуваат од Министерството за економија. мс/сп/