28 март 2023/11:30 

- Вицепремиерот за европски прашања Бојан Маричиќ изјави дека нема никаков договор ниту е разговарано за каква било друга интервенција во Уставот, освен за впишување на Бугарите, Црногорците, Хрватите и другите етнички заедници кои тоа го бараат.

Вицепремиерот во изјава за Дојче Веле, вели дека фокусот мора да е ставен на уставните измени кои произлегуваат од Преговарачката рамка со ЕУ.

-Некои прашања може да се решат и со идни процеси на уставни промени, посочува Маричиќ.

Според Маричиќ, отворањето на нови прашања и други теми надвор од првичната цел за промена на Уставот донекаде биле и очекувани.

- Министерот за економија Крешник Бектеши денеска најави дека најверојатно утре, на владина седница, ќе се донесе одлука за замрзнување на цените на хигиенските производи, а во текот на оваа недела ќе бидат замрзнати и цените на дел од овошјето и зеленчукот.

-Нема да чекаме несоодветно работење на одредени комисии во Собранието. Со одлука на Владата ќе ги намалиме цените на лепеза хигиенски прозводи на истиот начин како што го сторивме тоа и кај цените на прехранбените производи, до одреден датум, но датумот до кога ќе трае замрзнувањето ќе се дознае утре, истакна Бектеши по посетата на маркет во скопската населба Тафталиџе, заедно со преимерот Димитар Ковачевски и директорот на Државниот пазарен инспекторат, Горан Трајковски.

За овошјето и зеленчуот Бектеши рече дека вчера ги добил анализите од Министерството за земјоделство.

- Генералното собрание на Сојузот на средношколци на вонредна седница вчеравечер го прифатил компромисот понуден од Министерството за образование и наука (МОН) во врска со едно од нивните барања за државната матура.

На средбата со министерот Јетон Шаќири вчера во МОН, на претставниците на Сојузот им беше укажано дека поради утврдениот  календар за настава не може да се одложи првиот екстерен испит (Мајчин јазик и литература) од 27 мај за 3 јуни, но им беше понуден компромис - намален обем на тестот и олеснување во бодувањето. Сојузот најави дека за понудата ќе решава нивното Генерално собрание.

- Влијателен активист за образование на девојчиња во Авганистан е приведен од талибанските сили, соопшти денеска дипломатската мисија на Обединетите нации во земјата.

Авганистанскиот активист Матиула Веса (30) е шеф на PenPath, организација која се залага за правото на образование во земјата разурната од војна од 2009 година. Тој бил уапсен вчера во Кабул, јави ДПА.

„УНАМА ги повикува де факто властите да разјаснат каде се наоѓа тој, причините за неговото апсење и да му обезбедат пристап до правен застапник и контакт со семејството“, се вели во соопштението на Мисијата на ОН за помош во Авганистан.

- Парламентарните избори во Грција ќе се одржат на 21 мај 2023 година, соопшти претпладнево грчкиот премиер Киријакос Мицотакис за време на денешната владина седница.