Минхен, 31 мај 2025 (МИА) - Капитенот на Интер, Лаутаро Мартинез, изрази увереност дека тимот е подготвен да стави крај на 15-годишната пауза и да ја освои Лигата на шампионите, откако ќе го победи Пари Сен Жермен во финалето вечерва.

-Во мојата кариера кренав многу трофеи – со Интер и со Аргентина, но овој сè уште ми бега. Не размислувам постојано за тоа, но јасно е дека овој трофеј значи многу. Вечерва ќе се обидеме да одиграме натпревар на највисоко ниво и да го вратиме во Милано по толку години. Вакви натпревари се добиваат со концентрација, прецизност и целосна посветеност на секој детаљ. Подготовката мора да биде максимална, бидејќи ќе се соочиме со сериозен противник, рече Мартинез на официјалната прес-конференција пред натпреварот.

Нагласи дека и покрај капитенската лента, личните амбиции се инфериорни во однос на тимот.

-Ова ќе биде моето прво финале како капитен и тоа, секако, е посебно, но најважен е тимот. Финалињата не се обични натпревари – тие бараат поинаков пристап. Мораме да знаеме како да го повредиме противникот без да ја изгубиме почитта кон него. Поминавме низ сериозни предизвици - тешки противници, тешки гостувања и покажавме раст. Малку по малку ја заработивме почитта на сите. Сега сме на еден чекор од врвот и се надевам дека овој пат ќе можеме да го направиме тоа, порача Аргентинецот.

Мартинез истакна дека добро ги познава некои од играчите на ПСЖ, вклучувајќи го и Хвича Кварацхелиа, со кого често се соочувал во Серија А.

-ПСЖ има многу елегантни играчи и мора да бидеме внимателни со сите нив. Денешниот последен тренинг ќе биде посветен на завршните допири. Потоа ќе се обидеме да се одмориме за да бидеме свежи за најважната вечер, вели тој.

Лаутаро не пропушти да ја изрази својата благодарност до својот тренер.

-Симоне Инзаги нè води самоуверено и ни помага да се развиваме секој ден. Ако го освоиме трофејот, ќе му го посветиме нему, на навивачите и на нашите семејства. Работиме како еден – ден по ден, со јасна цел. Уште од мојот прв ден тука, сум благодарен на Интер и ќе продолжам да давам сè за овој клуб. Верувам дека сме подготвени за овој предизвик – ќе се подготвиме на најдобар начин и ќе се обидеме да уживаме во ноќта за која работевме со месеци, додаде Мартинез. дс

Фото: Архива