Отава, 5 март 2026 (МИА) – Канадскиот премиер Марк Карни изјави дека не може да ја исклучи воената вмешаност на неговата земја во ескалацијата на војната на Блискиот Исток.

Посетата на Карни на Австралија оваа недела беше засенета од растечката војна на Блискиот Исток, предизвикана од големиот американско-израелски напад врз Иран во кој беше убиен  врховен лидер на земјата, ајатолахот Али Хамнеи.

На заедничката прес-конференција со својот австралиски колега Ентони Албанезе во Канбера, Карни одговараше на прашање дали постои ситуација во која Канада би се вклучила во конфликтот.

„Невозможно е категорично да се исклучи учеството“, рече тој, нагласувајќи дека прашањето е „хипотетичко“.

„Ние ќе стоиме покрај нашите сојузници“, рече Карни, додавајќи дека „секогаш ќе ги браниме Канаѓаните“.

Карни рече дека нападите на САД и Израел врз Иран „не се во согласност со меѓународното право“.

Меѓутоа, тој ги поддржува напорите за спречување на Иран да се обиде да развие нуклеарно оружје, став што Канада го зазема „со жалење“ бидејќи претставува „уште еден пример за неуспехот на меѓународниот поредок“.

Канадскиот лидер денеска го повтори својот повик за „деескалација“ во конфликтот.

Целта на турнејата на Карни низ Азиско-пацифичкиот регион е да се намали зависноста на Канада од САД со цел да се заштити земјата од, како што рече тој, губењето на светскиот поредок предводен од САД.

Целта на австралиската етапа од турнејата е да се обезбедат инвестиции и да се продлабочат врските со партнерска „средна сила“ со која Канада дели многу ставови.сд/ми

Фото:ЕПА