• петок, 19 април 2024

За Ковачевски претседателот Пендаровски има капацитет да победи, Мицкоски смета дека Силјановска ќе го надомести она што е пропуштено во изминатите пет години

За Ковачевски претседателот Пендаровски има капацитет да победи, Мицкоски смета дека Силјановска ќе го надомести она што е пропуштено во изминатите пет години

Скопје, 3 април 2024 (МИА) - Лидерот на СДСМ Димитар Ковачевски вечерва во дуелот со претседателот на ВМРО-ДПМНЕ Христијан Мицкоски на Само вистина на Канал 5, кажа дека претседателот Стево Пендаровски има капацитет да однесе победа, додека Мицкоски, пак, оцени дека нивната кандидатка Гордана Силјановска-Давкова, ќе го надомести она што е пропуштено во изминатите пет години во мандатот на Пендаровски. 

-Во СДСМ сме убедени дека ќе ја добиеме довербата на граѓаните да ја формираме следната проевропска Влада на Македонија, а Стево Пендаровски ќе биде повторно избран за претседател на државата - бидејќи имаме многу јасна визија и многу јасен план за еврппската иднина на државата којшто се темели на храбри одлуки и на јасна визија и јасен план како тоа да го направиме, рече Ковачевски на прашањето на новинарот каков претседател и треба на земјава.

Според него, Пендаровски е нивниот избор за кандидат затоа што, како што кажа, тој во изминатот мандат покажа дека е претседател за сите, дека ги застапува прогресивните вредности и прогресивните политики и на СДСМ и на коалицијата која го поддржува, но пред се на граѓаните и затоа, додаде, неговата кандидатура практично беше поддржана од над 22.000 потписи на граѓаните, дополнително и на коалиционите партнери на СДСМ и Коалицијата за Европска иднина, рече тој.

Оцени дека Пендаровски се покажал како претседател на сите граѓни, кој не ги дели граѓаните ниту по еден основ, кој ги застапувал сите стратешки интереси на државата, не направил ниту една стратешка грешка, бил еден од клучните актери за зачленување на земјава во НАТО и при отпочнувањето на прегворите со ЕУ, и во време на криза.

-Сметаме дека потенцијалот на Пендаровски е поголем од на сите други кандидати, со што на 8 мај тој повторно ќе биде избран за претсаедател на државата, и на 8 мај заедно со коалицијата за Европска иднина ќе фомираме Влада која што Северна Македонија ќе ја внесе во ЕУ до 2030 година, рече Ковачевски.

Ковачевски потенцираше дека јасно се гледа кој од претседателските кандидати се застапува за надеж и европска интеграција, а тоа е кандидатот на СДСМ, Пендаровски, наспроти кандидатот на ВМРО-ДПМНЕ, Гордана Силјановска, која, според него, единствено граѓаните ја паметат по репликите во однос на потребата Северна Македонија бескрајно да го одложува носењето на потребните одлуки за интеграција на државата во ЕУ. 

-Силјановска покажа дека нема лидерски капацитет и никаква одлучност при носењето на важни одлуки за државата. Вие можете да замислите како би изгледала да нe претставува во НАТО или на самитите на ЕУ човек којшто секогаш бил против носење на одлуки за зачленување во НАТО и за продолжување на европскиот пат на државата. Затоа сметам дека победничкиот кандидат кој нуди визија, одлучност и лидерство за Северна Македонија да стане тоа што граѓаните го сакаат, а тоа земја членка на ЕУ, е претседателскиот кандидат Стево Пендаровски, рече Ковачевски.

Лидерот на ВМРО-ДПМНЕ Христијан Мицкоски, пак, кажа дека СДСМ долго време барал и конечно нашол чоевое кој е подготвен да изгуби, и нема подобар пример од Стево Пендаровски како човек којшто е подготвен да изгуби, да доживее дебакл во следните претседателски избори и оти тоа ќе стане јасно уште на 24 април.

-Јас мислам спротивно од ова што го кажа Димитар Ковачевски, сметам дека Стево Пендаровски како претседател не покажа ама баш ништо, со што ја заслужи титулата претседател. Тоа го видоа граѓаните, тоа е одличен пример на човек којшто како профил не одговара да биде претседател на државата, а уште повеќе да биде татко на нацијата, бидејќи тој не успеа да ја обедини нацијата, смета Мицкоски.

Мицкоски кажа дека неговата партија смета дека „тоа што го изгуби Македонија изминативе пет години додека Стево Пендаровски беше претседател ќе го надокнадиме многу брзо во следните пет години кога Гордана Силјановска Давкова ќе биде претседател на Македонија“.

-Тој е склон да озборува, нешто што не би требало да прави еден претседател. И најчесто тоа покрај тоа што го прави со политичките противници, го прави и со највисокото раководство на партијата која што го предложила да биде претседател. И мислам дека Македонија тоа што го изгуби изминативе пет години додека Стево Пендаровски беше претседател ќе го надокнадиме многу брзо во следните пет години кога Гордана Силјановска Давкова ќе биде претседател на Македонија, истакна претседателот на ВМРО-ДПМНЕ.

Тој посочи дека Пендаровски не поседува било каква претседателска карактеристика која што треба да биде одлучувачка за граѓаните да му го дадат својот глас. 

-Гордана Силјановска Давкова треба да биде претседател за да ги врати достоинството и почитта и дека таа нема лидерство доаѓа од устата на човекот кој нема изборен легитимитет, кој што е поставен, како што е Ковачевски и тој зборува за лидерство малку е чудно, рече Мицкоски.

Во однос на потписите собрани од граѓаните за Силјановска, Мицкоски вели дека тоа може многу лесно да се провери.

-Мнозинството во ДИК го има СДСМ и ДУИ зошто ја замајуваат јавноста и можат да ги отворат тие 28 илјади потписи и да видат дали има повеќе иле не. ВМРО-ДПМНЕ направи синергија помеѓу народот главниот суверен и вториот пратениците кога ја кандидираше, кажа Мицкоски. нд/

 

 


 

 

 

 

 

 

 

 

Остани поврзан