Каиро, 21 ноември 2025 (МИА) - Европската унија воведе санкции врз лидерот на суданска паравоена група поради „сериозни и тековни злосторства“ извршени од неговите сили во двегодишната војна со суданската армија.

Мерките објавени вчера против Абдел-Рахим Хамдан Дагал следат по слични санкции против неговата група Сили за брза поддршка, која е во војна со суданската армија.

Соединетите Американски Држави, исто така, воведоа санкции врз Дагал во септември 2023 година, на почетокот на конфликтот.

„Европската унија најостро ги осудува сериозните и тековни злосторства извршени од Силите за брза поддршка во Судан, вклучително и оние по заземањето на градот Ел Фашер“, се вели во соопштението на ЕУ.

Високиот претставник на ЕУ за надворешни работи и безбедносна политика, Каја Калас, рече дека санкциите „испраќаат сигнал дека меѓународната заедница секогаш ќе ги гони криминалците“.

Досега нема одговор од Силите за брза поддршка, а нивните напади оставија стотици мртви и принудија десетици илјади луѓе да избегаат во бегалските кампови.

Граѓанската војна во Судан започна во 2023 година кога избувнаа тензии меѓу суданската армија и

Силите за брза поддршка, а војната уби најмалку 40.000 луѓе, а расели 12 милиони. мс/сд/

фото: ЕПА