Тунис, 31 октомври 2025 (МИА) – Туниските власти наредија едномесечна суспензија на медиумската група „Наваат“, која раководи со еден од водечките независни истражувачки медиуми во Тунис, како дел од растечкото ограничување на слободата на изразување и граѓанското општество.

Суспензијата на активностите на „Наваат“ следи по слични акции против истакнати организации на граѓанското општество, како што се Тунискиот форум за економски и социјални права и Здружението на демократски жени, познати по одбраната на граѓанските слободи.

Властите како причина го наведоа странското финансирање на „Наваат“, но според активистите вистинската цел била да се замолчат неистомислениците.

Тунискиот сојуз на новинари ја осуди суспензијата како „опасна ескалација на обидите за замолчување на независното новинарство под административни изговори“.

„Наваат“ е формирана во 2004 година и истражува корупција и злоупотреби на човекови права пред и по револуцијата во Тунис. ми/

фото: МИА архива