Скопје, 4 септември 2024 (МИА) - Солидни резултати остварија македонските млади шахисти кои годинава се натпреваруваа на Европското првенство во Прага. Над 50% успешност остварија Моника Жежовска, Софија Беловска, Ахмет Селим Абдурахман и Антон Златков. 

Најдобар пласман оствари најмладата шахистка, Софија Беловска која се натпреваруваше во категоријата до осум години девојчиња. Беловска доби 5 од вкупно 9 поени и обезбеди  21 место од 55 учеснички од Европа, со што постигна и најдобар резултат за македонската репрезентација во нејзината категорија за прв пат. Победи во четири партии против шампионките и претставнички на Шпанија, Естонија, Кипар и домаќините од Чешка, ремизираше со Азербејџан и Чешка и изгуби од Романија, Холандија и Данска. 

-Беловска е најпријатното изненадување. Се работи за голем талент со предиспозиции да стане силна шахистка. Поседува голема упорност, желба, стрпливост во текот на партијата и да не стане од столчето по 4,5 часа, а и по партијата сака да остане во салата и да ги погледне другите партии, што е неверојатно за таа возраст. Мислам дека ќе имаме силна шахистка во идно време, уште повеќе ако се знае дека таа игра шах една година, од кои последните шест месеци континуирано, вели интернационалниот мајстот Марјан Митков, секретар во Шаховската федерација на Македонија (ШФМ), тренер и претставник на македонската шаховска делегација во Прага.

Најмногу бодови, пет ипол обезбеди Моника Жежовска која во моментов  на 16 годишна возраст важи за најдобар женски шахист во Македонија со највисок рејтинг- 2106. Жежовска обезбеди четири победи против претставничките на Азербејџан, Косово, Шпанија и Грција, одигра три реми со претставничките на Словачка, Србија и Шпанија и изгуби од шахистките на Украина и Унгарија.

Кај момчињата, пак, најуспешни се Ахмет Селим Абурахман (до 10 години) на 43-то место и сениорскиот репрезентативец ФМ Антон Златков (до 18 години) на 49-то место, двајцата со по пет поени.

Абдурахман победи против претставниците на Косово, Хрватска, Романија и Ерменија, ремизираше со шахистите од Швајцарија и Грција и изгуби од врсниците од Шведска и Босна и Херцеговина. 

-По резултатите и одиграните партии кај машките би го пофалил Абдурахман,  кој е двократен првак на Македонија до 8 и до 10 години и се работи за перспективен шахист, особено е ценет неговиот влог и работа во шахот, вели Митков. Според него, поголеми беа очекувањата на домашната шаховска публика од Жежовска и Златков со оглед на неговото знаење и искуство и одлично одиграните партии. 

Златков ги доби партиите против Исланд, Австрија, Унгарија и Украина, оствари нерешен резултат со Азербејџан и Полска и изгуби од двајца шахисти од Полска. 

Интернационалниот мајстор и наставник Орце Данчевски, оценува дека има потенцијал и шаховски талент кај нашите млади шахисти и смета дека со малку повеќе работа ќе успееме да се придвижиме кон шаховскиот врв во Европа. Според Данчевски, радуваат резултатите, особено фактот дека четири деца остварија над 50% успех на ова првенство и додава на вредност  тоа што две од нив се девојчиња, што е раритет во шаховските статистики на вакви првенства. 

-Ова се позитивни поместувања кои уште повеќе ме мотивираат да го зголемиме обемот на работа со нашите шаховски таленти. Имав можност да ги анализирам најголем дел од партиите на нашите претставници и можам да заклучам дека сме на добар пат. Недостасува малку поголема упорност и зголемување на работните часови за професионални тренинзи, вели Данчевски.

Според него, токму овие настани се импулс за промоција на шаховските резултати и дополнително мотивирање на нови деца, особено преку проектот „шах во училиштата”. 

-Проектот шах во училиштата, како и големиот број шаховски школи почнуваат да дават подобри резултати и се надевам дека во што поголем број училишта ќе се применува наставата по шах, а веќе следните години очекувам уште подобри резултати на ваквите настапи, вели Данчевски. 

Македонските претставници заедно на годинашното континентално првенство освоија вкупно 50,5 бода од 115 партии (40 победи, 21 реми, 54 порази) или 43,9 отсто. Седумте момчиња собраа 26,5 поени од 62 можни (21 победа, 11 ремија, 30 порази, 42,7 отсто), а девојчињата 24 поени од 53 партии (19 победи, 10 ремија, 24 порази, 45,2 отсто).

Резултати на македонските шахисти на ЕП во Прага
Категорија/Шахист/Рејтинг/ Поени/Место/Учесници

ДЕВОЈЧИЊА
8 год. Софија Беловска – 5/21/55
10 год. Андреа Цветановска – 2,5/69/73
12 год. Илијана Велева (1.556) 4,5/50/93
14 год. Ивана Велкоска (1.490) 3,5/94/109
16 год. Моника Жежовска (2.069) 5,5/25/96
18 год. Иџи Ајрадиноска (1.812) 3/71/84

МОМЧИЊА
8 год. Васил Иванов (1.452) 3/68/79
10 год. Ахмет Абдурахман (1.602) 5/43/113
10 год. Дамјан Николовски (1.526) 4/78/113
12 год. Павел Крстевски (1.873) 4/67/114
14 год. Андреј Иванов (1.879) 3,5/110/142
16 год. Ефе Ибраимов (1.770) 2/144/147
18 год. ФМ Антон Златков (2.297) 5/49/126

Фото: ФБ Орце Данчевски