Загреб, 18 декември 2024 (МИА) -  Бројот на Хрватите незадоволни од својот живот е речиси преполовен во изминатите 10 години, покажува истражувањето на Евробарометар според кое најголеми тешкотии за хрватските испитаници се инфлацијата, состојбата на економијата и пензиите, јавија хрватските медиуми.

Истражувањето, нарачано од Европската комисија и спроведено помеѓу октомври и ноември 2024 година, покажа дека 81 отсто од хрватските испитаници се задоволни од својот живот, а 19 отсто се незадоволни. Пред десет години, процентот на незадоволни луѓе во Хрватска беше околу 34.

Кога станува збор за просекот на ниво на Европската унија, 86 отсто од учесниците во истражувањето се задоволни од својот живот.

Просечниот хрватски и европски испитаник ја става инфлацијата како проблем број еден со кој се соочува нивната земја.

- Во Хрватска, пак, има речиси двојно повеќе луѓе загрижени за инфлацијата од просекот на ЕУ, а бројот на луѓе кои се загрижени за инфлацијата е зголемен за четири процентни поени во изминатите шест месеци, додека е намален за пет поени на Ниво на ЕУ, пишуваат авторите на истражувањето.

Имено, дури 63 отсто од хрватските испитаници ја потенцирале инфлацијата, односно растот на трошоците за живот, како еден од двата најголеми проблеми со кои се соочува земјата, додека во просек истото го избрале 33 отсто од испитаниците од Европа.

- Хрватските испитаници ја ставаат состојбата на економијата на второ место (22 отсто), што е на трето место за просечниот европски испитаник (18 отсто), се наведува во истражувањето.

Пензиите се третата најважна грижа за Хрватите (17 проценти), додека на ниво на ЕУ, пензиите се сметаат за значително помал проблем (девет проценти).

Хрватските и европските испитаници сметаат дека Украина е најголемата тешкотија со која се соочува Европската унија во моментов.

- Хрватските испитаници ја ставаат меѓународната ситуација на второ место (28 проценти), а европската имиграција (28 проценти).

Педесет и пет проценти од хрватските испитаници рекле дека имиграцијата на државјани од трети земји кај нив предизвикува негативни чувства, што приближно одговара на европскиот просек од 54 проценти.

Кога станува збор за имиграцијата на граѓани од другите земји-членки, 58 отсто од хрватските учесници ја поддржуваат, што е пониско од европскиот просек од 66 отсто.

- Хрватските испитаници сметаат дека на среден рок ЕУ најмногу треба да се занимава со економијата (41 отсто), потоа со безбедноста и одбраната (30 отсто) и со земјоделството (29 отсто).

Истражувањето забележа и пад на довербата на хрватските граѓани во Европската унија, која сега изнесува 53 отсто, четири процентни поени помалку од пред една година, но сепак два процентни поени повеќе од европскиот просек.

Негативна перцепција за ЕУ ​​имаат 13 отсто од хрватските и 17 отсто од европските испитаници. Сепак, 61 отсто од хрватските и 63 отсто од европските испитаници се лојални на ЕУ, нагласува истражувањето.
Истражувањето покажа дека 44 отсто се задоволни од функционирањето на демократијата во Хрватска, 55 отсто се незадоволни, додека останатите одговориле дека не знаат. Кога станува збор за просекот на ниво на Унијата, процентите се обратни. Пред десет години, задоволството од демократијата во земјата се движеше меѓу 20 и 24 проценти.

Исто така, во изминатите две години довербата во хрватските медиуми е зголемена за 12 процентни поени, а сега им веруваат 60 отсто од испитаниците, што е девет процентни поени помалку од просекот на ЕУ.

- Сепак, 70 проценти од хрватските и европските испитаници често се среќаваат со лажни вести, а три четвртини од хрватските и два процентни поени повеќе испитаници од Европа сметаат дека постоењето на дезинформации е проблем за нивната земја. зш/
фото ЕПА