Делчево, 27 март 2026 (МИА) – Претседателот на Советот на Општина Делчево, Николчо Стојменовски, денеска оствари работна средба со помошник-министерот во Министерство за внатрешни работи, Јован Алтанџиев, на која беа разгледани повеќе прашања за подобрување на административните услуги за граѓаните.

-Акцент беше ставен на реализацијата на проект за обезбедување нови простории за управните служби при МВР Делчево, како и на можностите за воведување нови управни услуги со цел поефикасно и побрзо сервисирање на потребите на граѓаните. Во таа насока, на последната седница на Советот на Општина Делчево беше усвоена одлука за давање на трајно користење недвижни ствари – службени простории на Министерството за внатрешни работи, истакна Стојменовски.

Одлуката, како што посочува претседателот на Советот, претставува важен чекор кон реализација на проектот.

-Со обезбедувањето нови простории се очекува да се подобрат условите за работа на управните служби, што директно ќе придонесе за повисок квалитет и достапност на услугите за граѓаните во Општина Делчево, додаде Стојменовски.

Надлежните изразија очекување дека соработката меѓу локалната самоуправа и институциите на централната власт ќе продолжи и во наредниот период со реализација на проекти од заеднички интерес. вс/дма/

Фото: МИА