Дебармаалски средби и серенади во чест на Свети Трифун
- По повод верскиот празник Свети Трифун, кој се смета за заштитник на лозарите и винарите и Свети Валентин - Меѓународниот ден на вљубените, денеска се одржаа Дебармаалски средби и серенади.
![Дебармаалски средби и серенади во чест на Свети Трифун](https://mia.mk/images/20221112050804_big_730x400_42.webp )
Скопје, 14 февруари 2022 (МИА) - По повод верскиот празник Свети Трифун, кој се смета за заштитник на лозарите и винарите и Свети Валентин - Меѓународниот ден на вљубените, денеска се одржаа Дебармаалските средби и серенади.
Оваа манифестација со 20-годишна традиција е во организација на уметникот Живко Поповски - Цветин.
Со пет балони беше пуштена порака за мир и љубов и за решавање на проблемите без закани, туку со разбирање и мирољубиво. Традиционално имаше погача од фурната „Силбо“, торта од слаткарницата „Апче“, а беше засадена лозница крај кафеаната „Кај Жабарот“ во Дебар Маало.
Во поетската програма поезија читаа Лидија Јеремиќ-Лучко, Мендо Димовски, Ѓорѓи Ѓоргиевски, Илко Димитриевски, Љубиша Николиќ, Жаклина Димовска и Тања Стоилковска.
Писателот и поет Мендо Димовски искажа здравица и порача сите во светот да живеат среќно, безгрижно, да бидат здрави и да шират љубов, мир и слобода.
На овие средби учествуваа и уметниците Љупчо Ангелов - гитара, Верица Ристевска, Вики Среброва, Круме Спасовски, Атина Апостолова и Серафина Фантаузо. мд/мч/
![Дебармаалски средби](/articles/images/%d0%b4%d0%b5%d0%b1%d0%b0%d1%80%d0%bc%d0%b0%d0%b0%d0%bb%d1%81%d0%ba%d0%/eRSCAOBSp/placeholder.webp?use_watermark=0)