Македонска Каменица, 21 декември 2024 (МИА) - Во Македонска Каменица вечерва се одржа годишниот концерт на Културно-уметничкото друштво „Вера Јоциќ“. На настанот присуствуваше и каменичкиот градоначалник Димчо Атанасовски кој истакна дека настанот, не само што е дел од овдешната традиција, туку и вистински празник за сите каменичани и на сите љубители на македонскиот фолклор и култура.

-Вие, драги членови на друштвото, сте наши најголеми културни амбасадори, носејќи ја нашата приказна низ целата држава и надвор од границите на Македонија. Веќе 45 години, КУД „Вера Јоциќ“ е светилник на традицијата и културата во Македонска Каменица. Со Вас, традиционалните носии, звуците на тапаните и гајдите, како и чекорите на ората, не потсетуваат на богатството на македонскиот дух и на аманетот од нашите предци, истакна Атанасовски. 

Како градоначалник на Македонска Каменица, најави дека општината ќе продолжи да ја поддржува работата на Културно-уметничкото друштво.

-Знаеме дека зачувувањето на културата бара труд, средства и посветеност, и токму затоа нашата поддршка ќе продолжи да се продлабочува. Заедно ќе создадеме услови Културно уметничкото друштво "Вера Јоциќ" да продолжи да расте, да ги инспирира младите и да ја пренесува љубовта кон традицијата на идните генерации, додаде Атанасовски. вс/аа/

Фото: Општина Македонска Каменица