Софија, 10 септември 2024 (МИА/БТА) - Бугарија обезбедува средства за соработка за развој од моментот на нејзиното пристапување во ЕУ. Во 2023 година, Софија обезбедила 93 милиони евра преку заедничкиот буџет на ЕУ, изјави во интервју за БТА европската комесарка за меѓународни партнерства, Јута Урпилаинен.

Ова е веста, која денеска ја избра МИА од сервисот на Бугарската телеграфска агенција (БТА), согласно Договорот за размена на информации и професионална соработка, кој предвидува секој ден националните информативни агенции на Северна Македонија и Бугарија да разменуваат по една вест, која ќе ја објават на својот интернет сајт без промени со изрично посочување и цитирање на партнерот како извор.

Ова претставува 0,6% од Официјалната помош за развој (ОПР) што земјите членки на ЕУ ја обезбедиле во 2023 година преку ЕУ, додаде таа.

Урпилаинен денеска ќе биде на работна посета на Бугарија, каде што ќе се сретне со министерот за надворешни работи во техничката влада, Иван Кондов, како и со претставници на бизнисот, невладиниот сектор и младински организации. Според неа, влијанието на Бугарија може да биде поголемо од нејзиниот финансиски придонес. „Знам дека Бугарија ги насочува своите напори кон Западниот Балкан и земјите од Источното партнерство, земајќи го предвид вашето богато искуство стекнато за време на процесот на пристапување“, изјави финската еврокомесарка во интервјуто направено преку електронска пошта во пресрет на нејзината посета.

Меѓу очекуваните теми на разговор денес ќе бидат геополитичката ситуација и учеството на Софија во спроведувањето на инвестиционата стратегија на ЕУ „Глобален портал“ (Global Gateway). „Глобален портал“ е позитивен предлог на ЕУ за партнерите, нашата инвестициона стратегија со цел мобилизирање на јавни и приватни инвестиции во вредност до 300 милијарди евра за одржлива инфраструктура и човечки развој во земјите од Глобалниот југ“, изјави Урпилаинен.

Со програмата се става посебен акцент на создавање додадена вредност на локално ниво и градење взаемно корисни партнерства, вклучувајќи индустријализација и создавање работни места, додаде таа. Урпилаинен нагласи дека ова не е европска алтернатива на „Еден појас, еден пат“ – кинеската програма за финансирање на инфраструктурни и други проекти за развој во Азија и Африка.

Медиумската информативна агенција овие текстови ги објавува во оригинална форма, согласно Договорот за размена на информации и професионална соработка меѓу двете национални новински агенции МИА и БТА.