Амстердам, 2 септември 2024 (МИА) - Холандското обвинителство денеска побара 14-годишна затворска казна за пакистанскиот муслимански верски лидер, Мухамед Ашраф Асиф Џалали, обвинет за поттикнување на убиство на антиисламскиот пратеник Герт Вилдерс, чија партија победи на минатогодишните парламентарни избори во Холандија, јавија американските медиуми.

Џалали не присуствуваше на сослушувањето во силно обезбедуваната судница во близина на Амстердам, каде што обвинителите посочија дека тој ја злоупотребил својата положба како имам за да ги повика своите следбеници да го обесат или обезглават Вилдерс.

За денеска попладне е закажано судење против уште еден Пакистанец за слични обвиненија. Не се очекува ниту тој да присуствува на случајот.

Се верува дека и двајцата не се во земјата, а Пакистан нема договор за екстрадиција со Холандија.

Американските медиуми пренесуваат дека Вилдерс е принуден речиси 20 години да живее под деноноќна полициска заштита поради неговата критика на исламот.

Минатата година поранешниот пакистански играч на крикет Калид Латиф беше осуден на 12 години затвор под обвинение дека објавил награда за смртта на Вилдерс. Латиф, исто така, не се појави на судењето. Во 2019 година, Пакистанец беше уапсен во Холандија и осуден на 10 години затвор за планирање терористички напад против Вилдерс, кој понекогаш го нарекуваат „Холанѓанецот Доналд Трамп“.

Вилдерс во изјавата пред судиите објасни за влијанието на заканите врз неговиот живот бидејќи од 2004 година живее со зголемено обезбедување крај себе. Двајца вооружени воени полицајци седеа во судницата за време на краткото судење.

„Секој ден станувате и одите на работа во оклопни автомобили, често со вклучени сирени и секогаш некаде во задниот дел од умот сфаќате дека ова може да биде вашиот последен ден“, изјави Вилдерс пред судот. „Сега имам 60 години, не се чувствувам слободен од мојата 40 година“, додаде тој.

Додека Џалали најверојатно никогаш нема да ја отслужи казната доколку биде осуден, Вилдерс рече дека се надева оти случајот испраќа порака до него и до светот дека нема да се толерира упатувањето смртни закани.

Обвинителот, кој побара да остане анонимен од безбедносни причини, им кажа на судиите дека заканите се појавија на социјалните мрежи откако Вилдерс во 2018 година објави дека организира натпревар во карикатура за пророкот Мухамед. Планираниот натпревар потоа предизвика лути протести во Пакистан и други муслимански земји.

Американските медиуми пренесуваат  дека физичките прикази на пророкот се забранети во исламот и се многу навредливи за муслиманите.

Вилдерс го откажа конкурсот за цртани филмови по лутите реакции во муслиманските земји и денеска пред судот изјави дека платил висока цена за своите постапки, кои ги опиша како одбрана на слободата на изразување.сд/

фото:МИА архива