Газа, 24 септември 2024 (МИА) - Палестинските власти утринава соопштија дека во израелските напади во градот Кан Јунис во Газа загинале најмалку седум лица, а 15 се повредени, меѓу кои има и жени и деца.

Во меѓувреме, израелските вооружени сили најавија дека ќе направат „се што е потребно“ за да го потиснат Хезболах од границата на Либан со Израел.

Двете страни меѓусебно се гранатираат од почетокот на војната меѓу Израел и Хамас. Израел вчера изврши стотици воздушни напади во јужен и источен Либан, при што загинаа речиси 500 луѓе, а повеќе од 1.600 беа повредени.

Илјадници жители на јужен Либан ги напуштија своите домови и предизвикаа сообраќаен метеж на главниот автопат кон Бејрут, што претставува најголемиот егзодус на луѓе од јужниот дел на земјата војната од војната меѓу Израел и Хезболах во 2006 година.

Според информациите од израелските вооружени сили, групата Хезболах синоќа истрелала повеќе од 100 проектили кон Израел. Гранати навлегле длабоко во израелска територија, вклучително и околу северниот град Хаифа и делови од окупираниот Западен Брег. Повеќето од нив беа пресретнати. паг/

Фото: МИА архива